ދަރަވަންދޫ އެއާޕޯޓަށް މޯލްޑިވިއަނުން އެންމެފަހުން ދަތުރުތައް ބާއްވާފައިވަނީ 2019 ވަނަ އަހަރުއެވެ.
މޯލްޑިވިއަނުން ބުނީ އެ އެއާލައިނުގެ ދަތުރުތައް އަލުން ދަރަވަންދޫއަށް ފެށިއިރު، ކޮންމެ ދުވަހަކު އެ އެއާލައިނުގެ ފްލައިޓެއް އެ އެއާޕޯޓަށް ބާއްވާނެ ކަމަށެވެ. ހަތަރު އަހަރުގެ މެދުކެނޑުމަކަށްފަހު މޯލްޑިވިއަނުން ދަރަވަންދޫއަށް ދަތުރުތައް ފަށާފައިވަނީ އޭޓީއާރު 42 މަރުކާގެ ބޯޓެއްގައެވެ.
މޯލްޑިވިއަނުގެ ދަތުރުތައް ދަރަވަންދޫއަށް ފެށުމާ ގުޅިގެން ބޭއްވި ރަސްމިއްޔާތުގައި އެ އެއާލައިނުގެ ޗީފް އޮޕަރޭޓިން އޮފިސަރު އިބްރާހިމް އިޔާޒް ވިދާޅުވީ ދަރަވަންދޫއަށް އަލުން ދަތުރުތައް ފަށާފައިވަނީ ލިބުނު "ފީޑްބެކް" އަށް ބަލާފައި ކަމަށެވެ.
ދަރަވަންދޫއަށް ދަތުރުތައް ފެށިއިރު އާ ހިދުމަތްތައް ތައާރަފުކޮށްފައިވާ ކަމަށާއި އިތުރު އާ ހިދުމަތްތައް ތައާރަފުކުރުމަށް މަސައްކަތް ކުރަމުންދާ ކަމަށް އިޔާޒް ވިދާޅުވިއެވެ. އިޔާޒް ވިދާޅުވެފައިވަނީ ދަރަވަންދޫ އެއާޕޯޓުގެ ހިދުމަތްތައް ރަނގަޅު ކުރުމަށް މަސައްކަތް ކުރަމުންދާ ކަމަށެވެ.
މޯލްޑިވިއަނުގެ ކޮމާޝަލް ޖެނެރަލް މެނޭޖަރު އިބްރާހިމް ހަމްދާން މުހައްމަދު ވިދާޅުވި ގޮތުގައި މިހާރު ދަރަވަންދޫއަށް ކޮންމެ ދުވަހަކު ފްލައިޓެއް ބޭއްވި ނަމަވެސް މި އަހަރުގެ ފަހުކޮޅުގައި ކޮންމެ ދުވަހަކު ތިން ފްލައިޓް ބޭއްވުމަށް މަސައްކަތް ކުރަމުންދާ ކަމުގައެވެ.
އެ ރަސްމިއްޔާތުގައި ވާހަކަދައްކަވަމުން ބ. އަތޮޅު ކައުންސިލުގެ ރައީސް އަހުމަދު އަފްރާހު ވިދާޅުވެފައިވަނީ އެ އަތޮޅަކީ ގިނަ ރިސޯޓުތަކެއް ހިންގަމުންދާ އަތޮޅަކަށް ވުމުން ފަތުރުވެރިންނާއި އަތޮޅުގެ ރައްޔިތުންނަށް ދަރަވަންދޫ އެއާޕޯޓަކީ ވަރަށް މުހިންމު އެއާޕޯޓެއް ކަމަށެވެ.
އަފްރާހު ވިދާޅުވި ގޮތުގައި އެއާޕޯޓު އިތުރަށް ތަރައްގީ ކުރުމަށް ހާއްސަ އަހައްމިއްޔަތުކަމެއް ދޭން ޖެހޭ ކަމަށެވެ.
މޯލްޑިވިއަނުން ދަރަވަންދޫއަށް ދަތުރުތައް ފަށާފައިވަނީ ކޮޅަކަށް 840 ރުފިޔާގެ ފެއާއެއްގައެވެ. އެ ރޭޓަކީ ދަރަވަންދޫއަށް ދަތުރުކުރަމުންދާ ދެ އެއާލައިނަށްވުރެ އަގުހެޔޮ ރޭޓެކެވެ.
