އެމެރިކާގެ ވޮޝިންޓަންގައި ރާއްޖޭގެ އެމްބަސީއެއް ގާއިމްކޮށް އަލުން ހުޅުވީ ފޮރިން މިނިސްޓަރު އަބްދުﷲ ޝާހިދު މިހާރު އެމެރިކާއަށް ކުރައްވަމުން ގެންދަވާ ދަތުރުފުޅުގައި އިއްޔެ އެވެ.
ރާއްޖޭގެ އެމްބަސީއެއް އެންމެ ފުރަތަމަ އެމެރިކާގައި ހުޅުވީ ކުރީގެ ރައީސް މައުމޫނު އަބްދުލްގައްޔޫމްގެ ވެރިކަމުގައި 2007 ވަނަ އަހަރު އެވެ. ނަމަވެސް ރައީސް މުހައްމަދު ނަޝީދުގެ ވެރިކަން 2008 ވަނަ އަހަރު ފެށުމުން ހަރަދު ކުޑަކުރުމަށް އެޅުއްވި ފިޔަވަޅުތަކުގެ ތެރޭގައި އެމެރިކާގައި ހުންނަ ރާއްޖޭގެ އެމްބަސީ ބަންދު ކުރިއެވެ.
މީގެކުރިން ރާއްޖޭގައިވެސް އެމެރިކާގެ އެމްބަސީއެއް ނުހުންނާތީ ރާއްޖެއާއި އެމެރިކާގެ ރަސްމީ މުއާމަލާތްތައް ކުރިއަށް ގެންދިޔައީ ސްރީ ލަންކާގައި ހުންނަ އެމެރިކާ އެމްބަސީ މެދުވެރިކޮށް އެމެރިކާގައި ހުންނަ ރާއްޖެ އދ. މިޝަން މެދުވެރިކޮށެވެ.
އެމެރިކާގައި ރާއްޖޭގެ އެމްބަސީއެއް ހުޅުވިއިރު އެމެރިކާއިން ވަނީ ރާއްޖޭގައިވެސް އެގައުމުގެ އެމްބަސީއެއް މިހާރު ހުޅުވާފައެވެ.
