މިގޮތުން މި މައްސަލައިގައި މިއަދު ވާހަކަ ދައްކަވަމުން ދިޔާނާ ވަނީ އިލެކްޝަން ކޮމިޝަނުގެ ދެ މެންބަރުން ދެމެންބަރުންގެ މެދުގައި ވޯޓު "ޓައި" ވުމުން ވަކި ކޮޅަކަށް ނިންމާނީ ކިހިނެއްތޯ ސުވާލު އުފައްދަވާފަ އެވެ.
ރޭ އިލެކްޝަންސް ކޮމިޝަނުގެ ޖަލްސާގައި ހަތަރު މެންބަރުން ބައިވެރިވެ ވަޑައިގެންނެވީ، ފަސް މެންބަރުންގެ ތެރެއިން އެއް މެންބަރަކު ހައްޖަށް ވަޑައިގެން ހުންނެވުމުންނެވެ. އެ ޕާޓީ އުފައްދަން ހުއްދަ ދޭން ފެނޭތޯ ނެގުނު ފެންނަ ނުފެންނަ ވޯޓުވަނީ ދެ ވޯޓު ދެ ވޯޓުން އެއްވަރުވެފައެވެ.
މި މައްސަލައިގައި އިލެކްޝަންސް ކޮމިޝަންގެ ރައީސް ފުވާދު ތައުފީގު އިއްޔެ މީޑިއާތަކަށް ވިދާޅުުވެފައިވަނީ "ދެ ވޯޓު ދެ ވޯޓުން އެއްވަރުވުމުން ހުއްދަ ނުދެވުނު" ކަމަށެވެ.
ދިޔާނާ މި ފަދަ ހައްލެއް ހުށަހަޅުއްވާފައިވާއިރު، ރައީސް ނަޝީދުގެ ސަޕޯޓަރުން އުފެއްދެވުމަށް މަސައްކަތްކުރާ 'ދަ ޑިމޮކްރެޓްސް' އުފެއްދުމުގެ ހުއްދަ ނުލިބިގެން އުޅެނީ ސަރުކާރާއި ގުޅިގެން އިލެކްޝަންސް ކޮމިޝަންގެ ދެ މެންބަރެއް މަސައްކަތް ކުރާތީކަމަށް އެ ޕާޓީ އުފެއްދުމުގައި އިސްކޮށް ހަރަކާތްތެރިވާ ބޭފުޅުން މިއަދު ވަނީ ތުހުމަތު ކުރައްވާފައެވެ.
