ށ. ނޫމަރާ ބަނދަރު ތަރައްގީކުރުމުގެ މަޝްރޫއާއި ބ. އޭދަފުށި ބަނދަރު ހެދުމުގެ މަޝްރޫއުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްފިއެވެ.
Advertisement
މި ދެ މަޝްރޫއު އެމްޓީސީސީ އާ ހަވާލުކުރުމަށް ޕްލޭނިން މިނިސްޓްރީގައި ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ޗީފް އެގްޒެކެޓިވް އޮފިސަ އާދަމް އާޒިމެވެ.
ޕްލޭނިން މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހުމަދު ހަމީދެވެ.
ނޫމަރާ ބަނދަރު ތަރައްގީކުރުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ރަށުގެ މިހާރުގެ ބަނދަރުތެރެ މެއިންޓެނަންސް ޑްރެޖްކުރުން
- އާ ބަނދަރެއް 3.5- މީޓަރަށް ފުން ކުރުން
- ނެރު 4- މީޓަރަށް ފުން ކުރުން
- 64 މީޓަރުގެ ބޮޑުހިލަ ރިވެޓްމެންޓް ޖެހުން
- 302.6 މީޓަރުގެ ބޮޑުހިލަ ބްރޭކްވޯޓަ ޖެހުން
- 177 މީޓަރުގެ އެލް-ބްލޮކް ވާޓަރު ޖެހުން
- 32 މީޓަރުގެ ވާޓަރު މަރާމާތު ކުރުން
- 4 ފައްތިޔާ ގާއިމުކުރުން
- 16 ހާބަރު ލައިޓް ޖެހުން
- 3 ނެރުބައްތި ޖެހުން
- 11x11 މީޓަރުގެ ރޭމްޕެއް ހެދުން
- 120 މީޓަރުގެ ޖެޓީއެއް
ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 57.60 މިލިއަން ރުފިޔާއަށް 455 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
އޭދަފުށި ބަނދަރު ހެދުމުގެ މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ:
- ރަށުގެ ހުޅަނގު ފަޅީގައި 303 މީޓަރުގެ ވާޓަރު ބަނދަރު ހެދުން
- 371 ބޮޑުހިލަ ރިވެޓްމެންޓް ޖެހުން
- 18 މީޓަރުގެ ކޮންކްރީޓް ބްރިޖެއް ހެދުން
- 119 މީޓަރުގެ ބޮޑުހިލަ ބޭރުތޮށި ޖެހުން
- 63 މީޓަރުގެ ނެރުފައިކަށި ޖެހުން
- 5،490 އަކަމީޓަރުގެ ސަރަހައްދެއް ހިއްކުން
- ވާޓަރުގައި ރޭމްޕެއް ހިމެނުން
- ވާޓަރާއި އިންވެގެން ޕޭވްމަންޓު ހެދުން
- ބަނދަރު ބައްތި ޖެހުން
- ނެރު ބައްތި ޖެހުން
ޕްލޭނިން މިނިސްޓްރީގެ ފަރާތުން މި މަސައްކަތް އެމްޓީސީސީ އާ ހަވާލުކޮށްފައިވަނީ 69.85 މިލިއަން ރުފިޔާއަށް 450 ދުވަހުގެ ތެރޭގައި މަސައްކަތް ނިންމާ ހަވާލުކުރާ ގޮތަށެވެ.
