ރާއްޖޭގެ ރަށްވެހިންނަށް ވެފައިވާ އިންޑިއާގެ ދެމީހަކަށް ގޯތިލިސްޓުން ޝަރުތުހަމަވާކަމަށް ދެއްކުމުން އެކަމާއި ގުޅޭގޮތުން ސުވާލު ކުރުމުން އަކްރަމް މިއަދު ވިދާޅުވީ މިހާތަނަށް އެގޮތަށް ތިބި ތިން މީހެއްގެ ނަން ހައުސިން މިނިސްޓްރީއަށް ފާހަގަ ކުރެވިފައިވާ ކަމަށެވެ.
ނަމަވެސް އެފަދަ އެއްވެސް މީހަަކަށް ގޯތި ނުދޭނެކަމަށާއި ގޯތި ފައިނަލް ލިސްޓް އާއްމުވެގެން ދާއިރު އެގޮތަށް ތިބި މީހުންގެ ނަންތައް އުނިކުރެވޭނެކަމުގެ ޔަގީންކަން ދެއްވާކަމަށް އަކްރަމް މިއަދު ވިދާޅުވިއެވެ.
މާލޭން ގޯތިލިބޭކަމަށް ޝަރުތުހަމަވާ ލިސްޓްގައި ފަހުން ދިވެއްސަކަށްވީ އިންޑިއާ މީހެއްގެ ނަން ހިމެނިފައިވާކަން އިއްޔެ ސަމާލުކަމަށް އައުމުން އަކްރަމް އިއްޔެ ވިދާޅުވީ އެއީ ޑީއެންއާރުގެ ޑާޓާބޭސްގައި އެ މައުލޫމާތު ނެތުމުން އެރި އޮޅުމެއްކަމަށެވެ.
ދާދިފަހުން ދިވެހި ރައްޔިތަކަށްވީ އިންޑިއާ މީހެއްގެ ނަން މާލެއިން ގޯތިލިބޭކަމަށް ޝަރުތު ހަމަވާ މީހުންގެ ލިސްޓްުގައި އޮތީ އޮޅުމަކުންކަމަށް ގެދޮރުވެރިޔާ ކޮމެޓީގެ ޗެއާ އަދި ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެ އެވެ.
މާލެއިން ގޯތި ލިބޭކަމަށް ޝަރުތުހަމަވާ މީހުންގެ ލިސްޓްގައި އޮތީ މއ. މަލިކުވިއު، ހަބީބު ރަހިމާން މުހައްމަދު ހަނީފާ އެވެ. އޭނާއަކީ ރާއްޖޭގައި ވިޔަފާރި ކުރާތާ ގިނަ ދުވަސްތަކެއް ވެފައިވާ އަދި ދިވެއްސަކާއި ކައިވެނިކޮށްގެން އުޅޭ އިންޑިއާ މީހެކެވެ.
އޭނާއަށް ދިވެހި ރައްޔިތުކަން ލިބިފައިވަނީ މީގެ ގާތްގަނޑަކަށް ފަސް ވަރަކަށް އަހަރު ކުރިންކަމަށް މައުލޫމާތު ލިބެއެވެ.
އަކްރަމް އިއްޔެ ސީއެންއެމްއަށް ވިދާޅުވީ ގޯތިލިބޭ ލިސްޓްގައި އޮން އިންޑިއާ މީހާއަކީ މިހާރު ދިވެހި ރައްޔިތެއް ނަމަވެސް އޭނާއަކީ މާލެއިން ގޯތި ދިނުމަށް ޝަރުތުހަމަވާ މީހެއް ނޫންކަމަށެވެ. އަދި ދާއިމީ ލިސްޓް ނެރޭއިރު އެކަން އިސްލާހު ކުރާނެކަމަށް އަކްރަމް ވިދާޅުވިއެވެ.
މާލެއިން ގޯތި ލިބޭނެކަމަސް ޝަރުތުހަމަވާ މީހުންގެ ލިސްޓްގައި އޭނާގެ ނަން އޮތީ، ޑީއެންއާރުގެ ޑާޓާބޭސްއިން އޭނާގެ ކުރީގެ ރަށްވެހިކަން އެނގެން ނެތުމުން އެރި އޮޅުމަކުންކަމަށްވެސް އަކްރަމް ވިދާޅުވިއެވެ.