ކެމްޕެއިން ލޯގޯގައި ރަމްޒު ކޮށްދެނީ ރާއްޖޭގެ ރަށްތަކެވެ. ވަށައިގެން ރާއްޖޭގެ ޗާޓު އޮތްއިރު، މެދުގައި ވަނީ "އުފާވެރި އަމާން ރާއްޖެ" ޖަހާފައެވެ. މިއީ މިފަހަރުގެ ކެމްޕެއިންގައި ރައީސް ޞާލިހުގެ ރަސްމީކޮށް ގެންގުޅުއްވާނެ ޝިއާރެވެ. ކެމްޕެއިން ދަތުރުތައް މިހަފްތާގައި ފަށާއިރު ދަތުރުތައް ފައްޓަނީ ށ.ފޯކައިދޫއިންނެވެ.
ރިޔާސީ އިންތިހާބުގައި އެމްޑީޕީގެ ފަރާތުން ވާދަކުރައްވާނެ ކެނޑިޑޭޓެއް ކަނޑައަޅުއްވާފައިވަނީ އެޕާޓީގެ ތެރޭގައި ބޭއްވު ރިޔާސީ ޕްރައިމަރީއަކުންނެވެ. މިއީ މިފަހަރުގެ ރިޔާސީ އިންތިހާބުގައި އެތެރޭގެ ޕްރައިމަރީއަކުން ރިޔާސީ ކެނޑިޑޭޓަކު ކަނޑައެޅި ފުރަތަމަ ޕާޓީވެސް މެއެވެ.
ރިޔާސީ ޕްރައިމަރީއަށްފަހު ކެމްޕެއިން ހަރަކާތްތައް އެމްޑީޕީން ދަނީ މާލެއާއި އަތޮޅު ތެރޭގެ ރަށްތަކުގައި ކުރިއަށް ގެންދަމުންނެވެ. މިދަތުރުތަކުގެ ބޭނުމަކީ ރިޔާސީ އިންތިހާބަށް އެމްޑީޕީން އެކުލަވާލާ މެނިފެސްޓޯއަށް ބޭނުންވާ މައުލޫމާތުތައް އެއްކުރުމާއި، ރަށްރަށުގައި ހުރި ކަންބޮޑުވުންތައް ސަރުކާރާއި ހަމައަށް ގެނެސް ދިނުމެވެ.
