ރާއްޖެއަށް މިހާރު ކުރަމުން އަންނަ ހުޅަނގު މޫސުމުގެ ވިއްސާރައިގައި އުތުރާއި މެދުރާއްޖެއަށް މާދަމާ ވައިގަދަ ވާނެކަމަށް މޫސުމާބެހޭ ޤައުމީ އިދާރާއިން މިއަދު ބުންޏެވެ. އެ އިދާރާއިން ބުނީ ވައިޖެހޭނެކަމަށް ލަފާކުރެވެނީ ގަޑިއަކު 18 މޭލު ބާރު މިނުގައިކަމަށެވެ. 

އަދި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވާނެކަމަށް މެޓު އޮފީހުން ލަފާކުރެއެވެ. އެހެންކަމުން އުތުރާއި މެދުރާއްޖެތެރޭގެ ކަނޑުތައް ގަދަވާނެކަމަށް ލަފާކުރެވޭތީ ސަމާލުވުމަށް މެޓު އޮފީހުން އިލްތިމާސްކުރެއެވެ. 

މިހަފްތާއަށް ބަލާއިރު އަންގާރަ ދުވަހަށްފަހު ދެކުނަށް ކުރަމުންދާ ވިއްސާރަ ކޮންމެވެސް ވަރަކަށް އަލިކުރާނެކަމަށް މެޓު އޮފީހުން ލަފާކުރެއެވެ. އެހެންނަމަވެސް އުތުރާއި މެދުރާއްޖެ ތެރޭގެ ސަރަޙައްދަށް ވިއްސާރަ އަލިކުރާނެކަމަށް ބެލެވެނީ ހޮނިހިރު ދުވަހުގެ ފަހުންކަމަށް މެޓު އޮފީހުން ބުންޏެވެ.