ރޭގެ ވަގުތެއްގައި ރާއްޖެ އައި އެ
ޑްރެޖަރު މި ވަގުތު އޮތީ ކަސްޓަމްސް ކްލިއަރެންސަށް ހއ. އުލިގަމުގައި ބަނދަރުކޮށްފައެވެ. ކްލިއަރެންސް ނިމުމާ އެކު އެ އުޅަނދު ދިއުމަށް ހަމަޖެހިފައިވަނީ ހއ. އިހަވަންދުއަށެވެ.
އެ ޑްރެޖަރުގެ ފުޅާ މިނުގައި 27.5 މީޓަރު (90 ފޫޓު) އަދި ދިގުމިނުގައި 142.5 މީޓަރު (467 ފޫޓު) ހުންނައިރު، 11،300 ކިއުބިކް މީޓަރުގެ ހޮޕަ ކެޕޭސިޓީ (އެއްފަހަރާ ލޯޑުކުރުމުގެ ގާބިލުކަން) ލިބިފައިވެއެވެ.
އެމްޓީސީސީއަށް ގެނައި ޑްރެޖަރާ ގުޅޭގޮތުން އެ ކުންފުނީގެ ސީއީއޯ އާދަމް އާޒިމް އިއްޔެ ވިދާޅުވީ އާ ޑްރެޖަރެއް ގެނައުމަށް ނިންމާފައިވަނީ ކުންފުނީގެ މައި ޑްރެޖަރު، "މަހާޖައްރާފު" ގެ ޑައިނަމޯ ހަލާކުވެފައިވާތީ ކަމަށެވެ. މަހާޖައްރާފުގެ ޑައިނަމޯ ހެދުމުގެ މަސައްކަތް އެ އުޅަނދު ބަން ކުންފުނިން ކުރަމުން އަންނަ ކަމަށް އާޒިމް ވިދާޅުވިއެވެ.
އެމްޓީސީސީގެ ޑްރެޖަރުތަކުގެ ތެރެއިން އެންމެ އަވަސް ޑްރެޖަރު، މަހާ ޖައްރާފުން ހިއްކެނީ ތިން ދުވަހުން ހެކްޓަރެއް ނަމަވެސް "ފިލީޕޯ ބްރޫނެލޭޝީ" އިން އެއް ދުވަހުގެ ތެރޭގައި އެއް ހެކްޓަރުގެ ބިން ހިއްކެއެވެ. މި ޑްރެޖަރުން ނުވަ ރަށެއްގެ ބިން ހިއްކުމުގެ މަސައްކަތްކުރާ ގޮތަށް ވަނީ ހަމަޖެހިފައެވެ. އެއީ ހއ. އިހަވަންދޫ އާއި ށ. ކޮމަންޑު އާއި ރ. އުނގޫފާރާއި ކ. ދިއްފުއްޓާއި އެ އަތޮޅު ގުޅި އާއި އއ. އުކުޅަހާއި އެ އަތޮޅު ބޮޑުފުޅަދޫ އާއި މ. ދިއްގަރުގެ އިތުރުން ފ. ފީއައްޔެވެ.
މި އަހަރުގެ އޮކްޓޯބަރު މަސް ނިމުމުގެ ކުރިން އެ ހުރިހާ ރަށެއްގެ ބިން ހިއްކުމުގެ މަޝްރޫއުތައް ނިންމުމަށް އެމްޓީސީސީން ވަނީ އަމާޒު ހިފާފައެވެ.
