ތިނަދޫގައި އަލަށް އިމާރާތްކުރެވުނު ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) ގެ އާ އިންޖީނުގެ ރައީސް ސޯލިހު ހުޅުވައިދެއްވާފައިވަނީ ވ. އަތޮޅަށް ކުރެއްވި ދަތުރުފުޅުގެ ތެރެއިންނެވެ.
ސްޓެލްކޯއިން ބުނީ ތިނަދޫ އާ އިންޖީނުގެއަކީ އެ ރަށުގައި ކުރިން ކަރަންޓުގެ ހިދުމަތްދެމުން ގެންދިޔަ އިންޖީނުގެ އާންމުން ދިރިއުޅެމުންދާ ސަރަހައްދެއްގައި ހުރުމުން އިންޖީނުގޭގެ ދުމާއި އަޑުގެ ސަބަބުން ރަށުގެ ރައްޔިތުންނަށާއި އެ ރަށުގައި ފަތުރުވެރިކަމުގެ ސިނާއަތުގައި ހަރަކާތްތެރިވަމުން އަންނަ ފަރާތްތަކަށް އަދި ފަތުރުވެރިންނަށްވެސް ބޮޑެތި ދަތިތަކެއް ކުރިމަތިވަމުން ދިއުމާ ގުޅިގެން އެ ދަތިތަކަށް ހައްލެއް ހޯދައިދިނުމުގެ ގޮތުން އަޅާފައިވާ އިންޖީނުގެއެއް ކަމަށެވެ.
ތިނަދޫ އާ އިންޖީނުގެ ރަސްމީކޮށް ރައީސް ހުޅުވައިދެއްވުން - ފޮޓޯ:ރައީސް އޮފީސް
ތިނަދޫއަކީ 2010 ވަނަ އަހަރު ރައްޔިތުންގެ އިންޖީނުގެތައް ސަރުކާރުން ހިންގަން ހަވާލުވާން ފެށުމާ އެކު އެ ކުންފުނިން ހަވާލުވި ފުރަތަމަ އިންޖީނުގެ ކަމަށް ސްޓެލްކޯއިން ބުނެއެވެ.
ސްޓެލްކޯއިން ބުނެފައިވަނީ އެ ކުންފުނިން ތިނަދޫގެ ކަރަންޓުގެ ކަންތައްތަކާ ހަވާލުވިއިރު ހުރީ ވަރަށް ކުޑަ، އެންމެ ޖަނަރޭޓަރެއް ކަމަށެވެ. އެހެންނަމަވެސް، އަލަށް ރަސްމީކޮށް ހުޅުވުނު އިންޖީނުގެ ހުޅުވުމާ ހަމައަށް، ބާ އިންޖީނުގޭގައި އާ ޖަނަރޭޓަރުތައް ބަހައްޓައި ރައްޔިތުންގެ އެދުމާ އެއްގޮތަށް މެދުނުކެނޑި ކަރަންޓުގެ ހިދުމަތް އެ ކުންފުނިން ވަނީ ފޯރުކޮށްދީފައި ކަމަށް ސްޓެލްކޯއިން ބުނެއެވެ.
ސްޓެލްކޯއިން ބުނި ގޮތުގައި އެ ކުންފުނީގެ ހިދުމަތް ގުޅިފައިވަނީ އާންމު ރައްޔިތުންނާއި ވިޔަފާރި ގުޅުވައިދޭ ވަރަށް މުހިންމު ނާރެހަކަށް ކަމަށްވުމާ އެކު، ތިނަދޫގެ އާބާދީ އާއި ރަށުގެ އިގުތިސޯދު އެކަމަކަށް ބިނާވާ ލޯކަލް ޓޫރިޒަމްގެ މަސައްކަތުގައި އެ ކުންފުނީގެ ދައުރު ބޮޑުކަމަށް ދެކި، ބާ އިންޖީނުގެއަކީ ޑިމާންޑާ އެއްވަރަށް ކޭޓާ ކުރުމުގައިވެސް ދަތިތަކެއް ހުރި ތަނަކަށްވުމުން އާ އިންޖީނުގެއެއް އެޅުމަށް ނިންމާ، އެ އިންޖީނުގޭގެ ބިންގާ އަޅާފައިވަނީ 2020 ވަނަ އަހަރުގެ ސެޕްޓެމްބަރު މަހުގެ 24 ވަނަ ދުވަހު ކަމުގައެވެ.
ބާ އިންޖީނުގެއިން ރައްޔިތުންނަށް ވަމުން ދިޔަ އުނދަގޫތަކުން ސަލާމަތްކޮށްދެއްވާނެ ކަމަށް ތިނަދޫގެ ރައްޔިތުންނަށް ރައީސް ސޯލިހު 2018 ވަނަ އަހަރު ވެވަޑައިގެންނެވި ވައުދާ އެއްގޮތަށް ތިނަދޫގައި ރަސްމީކޮށް ހުޅުވި އިންޖީނުގެއަކީ އެންމެ ޒަމާނީ، އަޑުމަޑު އިންޖީނުގެއެއް ކަމަށް ސްޓެލްކޯއިން ބުނެއެވެ.
ތިނަދޫ އާ އިންޖީނުގެ: 1.3 މެގަވޮޓުގެ ކަރަންޓު އުފެއްދުމުގެ ގާބިލުކަން ލިބިފައިވޭ - ފޮޓޯ:ސްޓެލްކޯ
ސްޓެލްކޯއިން ބުނީ ތިނަދޫގެ އާ އިންޖީނުގެއަކީ 1.3 މެގަވޮޓުގެ ކަރަންޓު އުފެއްދުމުގެ ގާބިލުކަން ލިބިފައިވާ އަދި ކަރަންޓުގެ ޑިމާންޑާ އެއްވަރަށް ޖަނަރޭޓަރު ސެޓް ބެހެއްޓޭގޮތަށް ފަރުމާކޮށްފައިވާ އިންޖީނުގެއެއް ކަމަށެވެ. އޭގެ އިތުރުން ތެލަށް ބަރޯސާވާ މިންވަރު ކުޑަ ކުރުމަށާއި އިއާދަކުރަނިވި ހަކަތައަށް އިސްކަންދިނުމަށް ކުރެވެމުންދާ މަސައްކަތްތަކުގެ ތެރެއިން ތިނަދޫގެ އާ އިންޖީނުގޭގެ ފުރާޅުގައި 30 ކިލޯވޮޓްގެ ސޯލާ ޕެނަލް ހަރުކޮށްފައިވާ ކަމަށް ސްޓެލްކޯއިން ބުނެއެވެ.
