މޮޅަދޫގައި އަލަށް އިމާރާތްކުރެވުނު ފެނަކަ ކޯޕަރޭޝަން ލިމިޓެޑް (ފެނަކަ) ގެ އާ އިންޖީނުގެ އާއި އޮފީސް އިމާރާތް ރައީސް ސޯލިހު ހުޅުވައިދެއްވާފައިވަނީ ހއ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އިއްޔެ ހަވީރު އެ ރަށު އިންޖީނުގޭގައި ބޭއްވި ހާއްސަ ރަސްމިއްޔާތެއްގައެވެ.
މޮޅަދޫގައި ހުޅުވުނު ފެނަކައިގެ އާ އިންޖީނުގެއަކީ ކުރިން އެ ރަށުގައި ހުރި އިންޖީނުގެއަށްވުރެ ގާތްގަނޑަކަށް ތިންގުނަ ބޮޑުކޮށް ހަދާފައިވާ އިންޖީނުގެއެކެވެ. އަލަށް ހުޅުވުނު އިންޖީނުގެ އިމާރާތާ ގުޅޭގޮތުން ފެނަކައިން ބުނީ މިއީ އެ ކޯޕަރޭޝަނުން ހުޅުވި 22 ވަނަ އިންޖީނުގެ ކަމަށެވެ. ފެނަކައިން ބުނެފައިވަނީ މީގެކުރިން އެ ރަށުގައި ބޭނުން ކުރަމުން އައި އިންޖީނުގޭގެ އިމާރާތަށް 25 އަހަރުވެފައިވާ ކަމަށެވެ.
މޮޅަދޫގެ 25 އަހަރުވީ ބާ އިންޖީނުގެ - ފޮޓޯ:ފެނަކަ
ކުރީގައި އިންޖީނުގެއެއްގެ ގޮތުގައި ބޭނުންކޮށްފައިވަނީ 14x28 ފޫޓުގެ އިމާރާތެއް ކަމަށް ފެނަކައިން ބުނެއެވެ. ފެނަކައިން ބުނީ އެތަނުގައި ހުރީ ހަތަރު މުވައްޒަފުންނަށް މަސައްކަތް ކުރާނެ ޖާގަ ކަމަށެވެ. މޮޅަދޫގެ އިންޖީނުގޭގައި އޮފީހެއްގެ ގޮތުގައި މީގެ ކުރިން ބޭނުން ކުރަމުން އައީ 28x22 ފޫޓުގެ އޮފީސް އިމާރާތެއް ކަމަށް ފެނަކައިން ބުނެއެވެ.
ފެނަކައިން ބުނި ގޮތުގައި މޮޅަދޫގައި އަލަށް އިމާރާތްކުރި އިންޖީނުގެއަކީ 50x94 ފޫޓުގެ އިމާރާތެއް ކަމުގައެވެ. އެ އިމާރާތުގައި އެއްފަހަރާ 30 މުވައްޒަފުންނަށް މަސައްކަތް ކުރެވޭނެ ޖާގަ ތަނަވަސް ކުރެވިފައިވާ ކަމަށް އެ ކޯޕަރޭޝަނުން ބުނެއެވެ. ފެނަަކައިން ބުނެފައިވަނީ އެ ރަށު އިންޖީނުގޭގެ އާ އޮފީސް އިމާރާތަކީ 33x49 ފޫޓުގެ އިމާރާތެއް ކަމަށެވެ.
ފެނަކައިން ބުނީ ކުރީގައި ބޭނުން ކުރަމުން އައި އިންޖީނުގޭގައި ހުރީ ޑެގް ރޫމަކާއި ކޮންޓްރޯލް ރޫމެއް ކަމަށާއި އޭރުގެ އޮފީސް އިމާރާތުގައި މެނޭޖަރު ރޫމަކާއި ސްޓާފް ރޫމަކާއި ރެސްޓް ރޫމެއް ހުރި ކަމަށެވެ. އަލަށް ހުޅުވުނު އިންޖީނުގޭގައި ކޮންޓްރޯލް ރޫމަކާއި ޑެގް ރޫމަކާއި ވޯކް ޝޮޕަކާއި ސްޓޯރަކާއި ޗިމްނީއަކާއި ފިއުލް ޓޭންކަކާއި ޕޭންޓްރީއެއްގެ އިތުރުން ފާހާނާއެއް ހުންނާނެ ކަމަށް އެ ކޯޕަރޭޝަނުން ބުނެއެވެ. ފެނަކައިން ބުނި ގޮތުގައި އަލަށް ހުޅުވި އޮފީސް އިމާރާތުގައި ރިސެޕްޝަނަކާއި ލޮބީއަކާއި މީޓިން ރޫމަކާއި މެނޭޖަރު ރޫމްއަކާއި ޓެކްނިކަލް ސްޓާފް ރޫމަކާއި ރެސްޓް ރޫމަކާއި ޕޭންޓްރީއެއް އަދި ފާހާނާއެއް ހިމެނޭ ކަމުގައެވެ.
މޮޅަދޫގައި އަލަށް އިމާރާތްކުރެވުނު ފެނަކަ އިންޖީނުގެ - ފޮޓޯ:ފެނަކަ
ފެނަކައިން ބުނެފައިވަނީ މީގެ ކުރިން ބޭނުން ކުރަމުން އައި އިންޖީނުގެ ހުރީ ރަށުގައި މީހުން ދިރިއުޅެމުން އަންނަ ސަރަހައްދުގައި ކަމަށް ވީނަމަވެސް އާ އިންޖީނުގެ އާއި އޮފީސް އިމާރާތް ބިނާކޮށްފައިވަނީ މީހުން ދިރިއުޅޭ ސަރަހައްދާ ދުރުގައި ކަމަށެވެ.
މޮޅަދޫގައި އަލަށް އިމާރާތް ކުރެވުނު އިންޖީނުގެ އާއެކު، ކަރަންޓު ކެޕޭސިޓީ ވަނީ 280 ކިލޯވޮޓުން 480 ކިލޯވޮޓަށް އިތުރުވެގެން ގޮސްފައެވެ.
