ޖޭއެސްސީން މިއަދު ބުނީ އެ ކޯޓުން ހުކުމް ކުރި ގޮތާ ގުޅިގެން އެކަން ފާހަގަކުރުމަށް، އެ އިސްތިއުނާފުގައި ހިމެނޭ ހަސްމަކާ ގުޅުން އޮންނަ ފަރާތަކުން ފޮނުވި ފަރީއްކޮޅަކާ، އެ ޝަރީއަތް ހިންގެވުމުގައި ބައިވެރިވެވަޑައިގެންނެވި ސުޕްރީމް ކޯޓުގެ ފަނޑިޔާރު މަހާޒު ހަވާލުވެވަޑައިގެންފައިވާކަމަށް ބުނާ މައްސަލައާ ގުޅިގެން ކޮމިޝަނުން ހިންގި ތަހުގީގަށް ހޯދުނު މައުލޫމާތާއި ފަނޑިޔާރު މަހާޒު ޒާހިރު ސާފުކޮށްދެއްވާފައިވާ ހަގީގަތްތަކަށް ރިއާޔަތްކުރާއިރު، އެ މައްސަލައިގައި ތުހުމަތުކޮށްފައިވާ ފަދަ ކަމެއް ހިނގާފައި ނުވާކަން ފާހަގަވާ ކަމަށެވެ.
އެހެންކަމުން އެ މައްސަލައިގެ ތަހުގީގު އިތުރަށް ކުރިއަށް ގެންދަން ނުފެންނަކަމަށް ޖޭއެސްސީން މިއަދު ވަނީ ނިންމާފައެވެ.
ގާތްގަނޑަކަށް ދޮޅު އަހަރު ފަހުން، އެކަމުގައި ފަނޑިޔާރު މަހާޒްގެ ސުލޫކީ މައްސަލައެއް ނެތް ކަމަށް ޖޭއެސްސީން މިއަދު ބޭއްވި ބައްދަލުވުމުގައި އެގޮތަށް ނިންމީ އެ ފަރިއްކޮޅަކީ މަހާޒް އަމިއްލަފުޅު ހަރަދުގައި އޯޑަރުކޮށްގެން ގެނައި އެއްޗެއްކަން ސާބިތުވާ ހެކި ލިބިފައިވާތީ އެވެ.
އެ ތުހުމަތުތަކާ ގުޅިގެން މަހާޒް މީގެ ކުރިން ވިދާޅުވެފައިވަނީ އެ މައްސަލަ އޮންނަ ކޮންމެ ދުވަހަކު އަޑުއެހުންތައް ދިގުލައިގެންދާތީ މެންދުރުގެ ކެއުމެއް ފަނޑިޔާރުން އަމިއްލަ ހަރަދުގައި ބާއްވަމުންދިޔަ ކަމަށެވެ.
އަދި ޔާމީންގެ މައްސަލަ ނިންމި ދުވަހަކީ ސުޕްރީމް ކޯޓުގެ ރިސެސްގެ ކުރިން އަންނަ ރަސްމީ ފަހު ދުވަސް ކަމަށްވާތީ އެދުވަހުގެ ކެއުން ދިނީ އޭނާގެ އަމިއްލަ ހަރަދުގައި ކަމަށް އޭނާ ވިދާޅުވި އެވެ.
ގއ. ވޮޑަމުލާގެ މައްސަލާގައި ޔާމީން ފަސް އަހަރަށް ޖަލަށްލާން ކުރި ހުކުމް ސުޕްރީމް ކޯޓުން އޭރު ބާތިލްކުރީ ފަނޑިޔާރު މަހާޒް ރިޔާސަތު ބެލެހެއްޓެވި ތިން ފަނޑިޔާރުންގެ ބެންޗުގެ އިއްތިފާގުންނެވެ.
