މިއަދު ބޭއްވި ހާއްސަ ރަސްމިއްޔާތެއްގައި ބިންގާ އަޅުއްވައި ދެއްވީ ނާއިބު ރައީސް ފައިސަލް ނަސީމް އާއި އިސްލާމިކް މިނިސްޓަރ ޑރ. އަހުމަދު ޒާހިރު ޢަލީ އާއި، އައްޑޫސިޓީގެ މޭޔަރ އަލީ ނިޒާރުއެވެ.
އައްޑޫގައި އިސްލާމީ މަރުކަޒު ހަދަނީ ހިތަދޫގެ ކުރީގެ ޕޮލިސް ޓްރެއިނިންގް ސްކޫލު ހުރި ބިމުގައެވެ.
އައްޑޫގައި އިސްލާމީ މަރުކަޒެއް އަޅަންފިޑޯ ޕްރައިވެޓް ލިމިޓެޑްއާ ހަވާލުކުރީ މިދިޔަ މާޗު މަހުއެވެ.
އެ މަސައްކަތް އެ ކުންފުންޏާ ހަވާލުކުރީ 55.5 މިލިއަން ރުފިޔާއަށް 450 ދުވަހުގެ ތެރޭގައި ނިންމާ ގޮތަށެވެ.
އައްޑޫގައި ހަދާ އިސްލާމީ މަރުކަޒުގައި އެއް ފަހަރާ 1،500 މީހުންނަށް ނަމާދު ކުރެވޭނެ ޖާގައިގެ ނަމާދު ގެއެއް ވެސް ހަދާނެއެވެ.
އޭގެ އިތުރުން އެ ތަނުގައި މަލްޓިޕާޕަސް ހޯލަކާއި ހަތަރު ކުލާސްރޫމް އާއި ސެމިނާތަކަށް ހާއްސަ ދެ ރޫމްއާއި އިސްލާމީ ލައިބްރަރީއެއްގެ އިތުރުން އޮފީސް އިމާރާތެއް ވެސް ހިމެނެއެވެ.
