ހުޅުމާލޭގެ ފުރަތަމަ ފިޔަވަހީގައި އެސްޓީއޯއިން ހިންގަމުން ދިޔަ ފިހާރަ މަރާމާތަށްފަހު، ސްމާޓް ސްޓޯރެއްގެ ގޮތުގައި މިއަދު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.
ކޭޝިއަލެސް ނުވަތަ ކޭޝިއަރުން ނުތިބޭ މި ފިހާރައިން ވިޔަފާރި ކުރެވޭނީ އެސްޓީއޯއިން އެކަމަށް ތައްޔާރުކޮށްފައިވާ ހާއްސަ އެޕްލިކޭޝަނެއް ބޭނުންކޮށްގެންނެވެ. އެސްޓީއޯއިން ބުނީ އެ އެޕްލިކޭޝަން ޕްލޭ ސްޓޯރުންނާއި އެޕް ސްޓޯރުން ޑައުންލޯޑު ކުރެވޭނެ ކަމަށެވެ.
އެޕްލިކޭޝަނުގައި ރެޖިސްޓާވުމުން އެ ފަރާތެއްގެ ބޭންކު ކާޑު، އެޕްލިކޭޝަނާ ގުޅޭނެ ކަމަށް އެ ކުންފުނިން ބުނެއެވެ. އެސްޓީއޯއިން ބުނެފައިވަނީ އެ އެޕްލިކޭޝަން ޖެނެރޭޓު ކުރާ ކިއުއާރު ކޯޑު ސްކޭން ކޮށްލުމުން ފިހާރައަށް ވަދެވޭނެ ކަމަށާއި ފިހާރައިން މުދާ ނަގަމުންދާވަރަކަށް އެ ފަރާތެއްގެ ބިލަށް އެ އެއްޗެއް އިތުރުވެ، ފައިސާ ކެނޑެމުންދާނެ ކަމަށެވެ. އެސްޓީއޯ ސްމާޓް ސްޓޯރުގެ ބޭރުގައި އެ ސްޓޯރުން ވިޔަފާރި ކުރެވޭނެ ގޮތް ދިވެހި ބަހާއި އިނގިރޭސިބަހުން އާންމުންނަށް އެނގޭނެ ގޮތަށް ކިޔާދީފައި ހުންނާނެ ކަމަށް އެ ކުންފުނިން ބުނެއެވެ.
އެސްޓީއޯއިން ބުނި ގޮތުގައި ކަސްޓަމަރުން ފިހާރައަށް ވަންނަ ހިސާބުން ފެށިގެން ފިހާރައިގައި ހަރުކޮށްފައިވާ ކެމެރާތަކުން އެ ކަސްޓަމަރެއްގެ ހަރަކާތްތައް ދެނެގަންނަމުންދާނެ ކަމަށެވެ. އެގޮތުން ހަރުތަކުގައި ގާއިމުކޮށްފައި ހުންނަ ވެއިޓް ސެންސަރުތަކުން އެ ހަރަކުން މުދާ ނަގައިފި ނަމަ، އެ ނަގާ އެއްޗަކީ ކިތަންމެ ކުޑަ އެއްޗެއް ނަމަވެސް އެ އެއްޗެއްގެ ބަރުދަނުން އެކަން ދެނެގަންނާނެ ކަމަށް އެ ކުންފުނިން ބުނެއެވެ. ކަސްޓަމަރު ބޭނުންވާ މުދާ ހަރުތަކުން ނަގަމުންދާވަރުން ވާޗުއަލް ކާޓަކަށް އެޑުވަމުން ދާނެ ކަމަށާއި އެ އެއްޗެއް އަލުން ހަރަށް ލައިފި ނަމަ، ކާޓުން އެ އެއްޗެއް އުނިވާނެ ކަމަށް އެސްޓީއޯއިން ބުނެއެވެ. އެ ކުންފުނިން ބުނެފައިވަނީ ކަސްޓަމަރު ފިހާރައިން ނިކުންނައިރު އެ ފަރާތަކުން ނެގި މުދަލަށްވާ ފައިސާ އެ ކަސްޓަމަރެއްގެ އެކައުންޓުން ކެނޑޭނެ ކަމަށާއި 10 އާއި 15 ސިކުންތާ ދެމެދު ފައިސާގެ ރަސީދު ލިބޭނެ ކަމަށެވެ. އެސްޓީއޯއިން ބުނި ގޮތުގައި އެ ފަރާތެއްގެ އެކައުންޓުގައި އެ ވަގުތު ފައިސާ ނެތްނަމަ އެންމެ އަވަހަށް އެ އެކައުންޓަކަށް ޖަމާކުރާ ފައިސާއިން އެ އަދަދެއް އުނިކުރާނެ ކަމުގައެވެ.
އެސްޓީއޯއިން ބުނީ ސްމާޓް ސްޓޯގައި ނިއު އެމާޖިން ދެ ޓެކްނޮލޮޖީއެއް ބޭނުންކޮށްފައިވާ ކަމަށެވެ. އެއީ އާޓިފިޝަލް އިންޓެލިޖެންސްގެ ވިޝަން އާއި އައިއޯޓީ ބޭނުންކޮށްގެން ފިހާރައިގައި ކޭޝިއަރަކު ނެތި ކަސްޓަމަރު ވަދެ ޓްރާންސެކްޝަން ނިންމާފައި ނިކުމެގެންދާ ޕްރޮސެސް ކަމަށް އެ ކުންފުނިން ބުނެއެވެ.
އެސްޓީއޯއިން ބުނީ ކިއުއާރު ކޯޑު ބޭނުންކޮށްގެން އެ ސްޓޯރަށް ވަދެ ވިޔަފާރި ކުރުމުގެ އިތުރުން އެޕްލިކޭޝަނުގައި ހިމަނާފައިވާ ފޭސް ރިކޮގްނިޝަން ފީޗާގައި އެމީހެއްގެ މޫނު ރެޖިސްޓްރީ ކުރުމުން ފޯނު ނެތް ހާލަތުގައި މޫނު ސްކޭން ކޮށްލުމަށްފަހު، ވަދެ ވިޔަފާރި ކުރެވޭނެ ކަމަށެވެ.
އެސްޓީއޯ ސްމާޓް ސްޓޯރުން ވިޔަފާރި ކުރުމަށް ތައްޔާރުކުރެވުނު ހާއްސަ އެޕްލިކޭޝަނުގައި ބޭނުން ކުރަނީ ބީއެމްއެލްގެ ޓޯކަނައިޒޭޝަން ސިސްޓަމް ކަމަށްވުމުން ކާޑު ރެޖިސްޓާ ކުރާ ހިސާބުން ތިން ރުފިޔާ ޗާޖު ކުރާނެ ކަމަށް އެސްޓީއޯއިން ބުނެއެވެ. އެ ކުންފުނިން ބުނެފައިވަނީ ކަސްޓަމަރު ކުރާ ފުރަތަމަ ވިޔަފާރީގެ ޓްރާންސެކްޝަނުގެ ތެރޭގައި އެ ތިން ރުފިޔާ ހިމަނާނެ ކަމަށެވެ.
ކޮމްޕިއުޓަ ވިޝަންއިން 99 އިންސައްތަ އެކިއުރޭޓްވި ނަމަވެސް އެއް އިންސައްތަ ޕްރޮޑަކްޓް މިސްރީޑްވުމުގެ ފުރުސަތު އޮތުމާ އެކު، އެފަދަ ހާލަތެއް މެދުވެރިވެއްޖެ ނަމަ އެޕްލިކޭޝަން މެދުވެރިކޮށް ރިފަންޑްކުރުމުގެ ފުރުސަތު ނުވަތަ ސަޕޯޓަ ކޮންޓެކްޓްކުރުމުގެ ފުރުސަތު ކަސްޓަމަރުންނަށް ލިބޭނެ ކަމަށް އެކުންފުނިން ބުނެއެވެ.
އެސްޓީއޯ ސްމާޓް ސްޓޯ ހުޅުވުމަށް ބޭއްވި ރަސްމިއްޔާތުގައި އެ ކުންފުނީގެ މެނޭޖިން ޑިރެކްޓަރު ވާހަކަދައްކަވަނީ - ފޮޓޯ:އެސްޓީއޯ
އެސްޓީއޯ ސްމާޓް ސްޓޯ ހުޅުވުމަށް ބޭއްވި ރަސްމިއްޔާތުގައި އެ ކުންފުނީގެ މެނޭޖިން ޑިރެކްޓަރު އަބްދުﷲ ސައީދު ވިދާޅުވީ އެ ސްޓޯރާ އެކު، ރާއްޖެއަށް ތައާރަފުކުރެވިގެން ދިޔައީ މުޅިން އާ ޓެކްނޮލޮޖީއެއް ކަމަށެވެ. މި ސަރަހައްދުގައި މިފަދަ ސްމާޓް ފިހާރަތައް މަދުވުމާ އެކު މިއީ ރާއްޖެއަށް ލިބިގެންދިޔަ ވަރަށް ބޮޑު ކާމިޔާބީއެއް ކަމަށް ސައީދު ވިދާޅުވިއެވެ.
ސައީދު ވިދާޅުވި ގޮތުގައި އެސްޓީއޯއިން ސްމާޓް ސްޓޯރެއް ހުޅުވުމުގެ އެންމެ ބޮޑު ބޭނުމަކީ ރާއްޖޭގެ ވިޔަފާރިވެރިންނަށާއި އަދި އާންމު ރައްޔިތުންނަށް ފަސޭހަތަކެއް ލިބިގެން ދިއުން ކަމަށާއި އެ ސްޓޯރުގައި ތަޖުރިބާ ކުރެވެމުންދާ ޓެކްނޮލޮޖީއަކީ ވިޔަފާރިކުރާ އެހެން ފަރާތްތަކަަށް އެކި ގޮތްގޮތަށް ބޭނުން ކުރެވޭނެ ޓެކްނޮލޮޖީއެއް ކަމަށް ދެކޭ ކަމުގައެވެ.
އެސްޓީއޯ ސްމާޓް ސްޓޯ ހުޅުވުމަށް ބޭއްވި ރަސްމިއްޔާތުގައި ނައިބު ރައީސް ވާހަކަދައްކަވަނީ - ފޮޓޯ:ރައީސް އޮފީސް
އެ ރަސްމިއްޔާތުގައި ވާހަކަދައްކަވަމުން ނައިބު ރައީސް ވިދާޅުވީ އެސްޓީއޯއިން ސްމާޓް ސްޓޯރެއް ހުޅުވުމަކީ ވަރަށް ރަނގަޅު ފެށުމެއް ކަމަށެވެ.
އެސްޓީއޯއަކީ ރައްޔިތުންނަށް ފަސޭހަކޮށް ހިދުމަތްތައް ފޯރުކޮށްދޭން އަބަދުވެސް މަސައްކަތް ކުރާ ކުންފުންޏެއް ކަމަށާއި މިއަދު ހުޅުވި ސްޓޯރާ އެކު ހިދުމަތްތައް އިތުރަށް ފުޅާވެގެންދާނެ ކަމަށް އުންމީދު ކުރައްވާ ކަމަށް ނައިބު ރައީސް ވިދާޅުވިއެވެ. އާންމު އުސޫލުން ކަންތައްތައް ކުރާ ގޮތަށް ކުރާ ނަމަ، ހިދުމަތްތައް ހޯދުމަށާއި ލިބިގަތުމަށް ގޮންޖެހުންތައް ހުރިކަން ފާހަގަކުރައްވާ ނައިބު ރައީސް ވިދާޅުވެފައިވަނީ ޓެކްނޮލޮޖީ އާއެކު ފަސޭހަތަކެއް ލިބި އެތައް ކަންތައްތަކެއް ހަލުވިމިނެއްގައި ކުރެވެމުން އަންނަ ކަމަށެވެ.
