މައުމޫން ފައުންޑޭޝަނަކީ މީގެ 13 އަހަރު ކުރިން ކުރީގެ ރައީސް މައުމޫން އަބްދުލްގައްޔޫމް އިޖުތިމާއީ މަސައްކަތްތައް ކުރައްވަން އުފެއްދި ފައުންޑޭޝަނަކެވެ. 2010 ގައި އުފެއްދި އެ ޖަމިއްޔާގެ ބޭނުމަކީ ދިވެހި ޒުވާނުންނަށް ތަފާތު ފުރުސަތުތައް ފަހިކޮށްދިނުމެވެ. މައުމޫން ފައުންޑޭޝަން އުފެއްދީއްސުރެ، ރާއްޖެއިންނާއި ރާއްޖެއިން ބޭރުން މަތީ ތައުލީމުގެ ގިނަ ފުރުސަތުތަކެއް ވަނީ މިހާތަނަށް ފަހިކޮށްދީފަ އެވެ. އެ ފައުންޑޭޝަނުން ދަރިވަރުންނަށް ސްކޮލާޝިޕް ދިނުމާއި ދިނީ ދަރުސްތައް ވެސް ދެ އެވެ. ނަމަވެސް ކޮވިޑަށް ފަހު އެ ޖަމިއްޔާގެ ކަންކަން ވަނީ މަޑުޖެހިފައެވެ.
ޔޫތު މިނިސްޓްރީން މިދިޔަ ހަފްތާގައި ކުރި އިއުލާނެއްގައި ބުނެފައިވަނީ އެ މިނިސްޓްރީން އުވާލަން އިއުލާން ކުރި ލިސްޓުގައި ހިމެނޭ ޖަމިއްޔާތަކަކީ ވިދިވިދިގެން 2 އަހަރުގެ އަހަރީ ރިޕޯޓް ހުށަހަޅާފައި ނުވާ އަދި / ނުވަތަ ހިންގާ ކޮމެޓީ ރަޖިސްޓްރީކޮށްފައި ނުވާތީ އުވާލުމަށްޓަކައި ލިސްޓް ކުރެވިފައިވާ ޖަމްއިއްޔާތަކެއް ކަމަށެވެ.
މިހާރު އާންމުކޮށްފައިވާ ލިސްޓްގައިވާ ޖަމިއްޔާތަަކަށް ސެޕްޓެމްބަރު 24، 2023 ވާ އަންގާރަ ދުވަހުގެ މެންދުރު 2:00 އާ ހަމައަށް އިތުރު ފުރުސަތެއް ދޭނެ ކަމަށް މިނިސްޓްރީން ބުންޏެވެ.
އެ ފުރުސަތު ދޭން ނިންމީ ރަޖިސްޓަރީ ކޮށްގެން ހިންގަމުންދާ ޖަމިއްޔާތަކުން ނިސްބަތްވާ ރަށާއި އަތޮޅަށް އަދި މުޅި ގައުމަށް ފައިދާ ހުރި މަސައްކަތްތަކެއް ހިލޭސާބަހަށް ކުރާތީ ކަމަށް ޔޫތު މިނިސްޓްރީން ބުންޏެވެ.
