ހުޅުމާލޭގެ ފުރަތަމަ ފިޔަވަހީގައި އެސްޓީއޯއިން ހިންގަމުން ދިޔަ ފިހާރަ މަރާމާތަށްފަހު، ރާއްޖޭގެ ފުރަތަމަ އާޓިފިޝަލް އިންޓެލިޖެންސް ސްމާޓް ސްޓޯރުގެ ގޮތުގައި ހުޅުވިތާ ހަތް ދުވަސްވެފައިވާއިރު، އެ ސްޓޯރާ ގުޅުންހުރި ބައެއް މުހިންމު އުސްއަލިތައް އެސްޓީއޯއިން ވަނީ ހާމަކޮށްފައެވެ. އެގޮތުން އެ ކުންފުނިން އަލިއަޅުވާލާފައިވާ ބައެއް ކަންކަމަކީ،
- ސްޓޯރުގެ ތެރޭގައި އެވްރެޖްކޮށް ކަސްޓަމަރަކު ހޭދަކޮށްފައިވަނީ 317 ސިކުންތު
- މުދަލަށް ފައިސާ ކެނޑުމަށް ހޭދަވެފައިވަނީ ގާތްގަނޑަކަށް ތިން ސިކުންތު
- 2،700 މީހުން ސްމާޓް ސްޓޯ އެޕް ޑައުންލޯޑްކޮށްފައިވާއިރު، އޭގެ ތެރެއިން 1،937 މީހުން ފިހާރައަށް ވަދެފައިވޭ
- 24 އިންސައްތަ މީހުން ފާހަގަކުރެވިފައިވަނީ ތަކުރާރުކޮށް ބާޒާރުކުރާ ކަސްޓަމަރުންގެ ގޮތުގައި
- ހަތް ދުވަހުގެ ތެރޭގައި ސްޓޯރަށް ވަދުނު 1،937 މީހުންގެ ތެރެއިން 22 ކަސްޓަމަރުންގެ އެޕީލް ލިބިފައިވޭ
އެސްޓީއޯއިން ބުނެފައިވަނީ ސްމާޓް ސްޓޯރަށް އެއްފަހަރާ ވަދެވޭނީ ހަ މީހުންނަށް ކަމަށެވެ. ކޭޝިއަލެސް ނުވަތަ ކޭޝިއަރުން ނުތިބޭ މި ފިހާރައިން ވިޔަފާރި ކުރެވޭނީ އެސްޓީއޯއިން އެކަމަށް ތައްޔާރުކޮށްފައިވާ ހާއްސަ އެޕްލިކޭޝަނެއް ބޭނުންކޮށްގެންނެވެ. އެސްޓީއޯއިން ބުނީ އެ އެޕްލިކޭޝަން ޕްލޭ ސްޓޯރުންނާއި އެޕް ސްޓޯރުން ޑައުންލޯޑު ކުރެވޭނެ ކަމަށެވެ.
އެޕްލިކޭޝަނުގައި ރެޖިސްޓާވުމުން އެ ފަރާތެއްގެ ބޭންކު ކާޑު، އެޕްލިކޭޝަނާ ގުޅޭނެ ކަމަށް އެ ކުންފުނިން ބުނެއެވެ. އެސްޓީއޯއިން ބުނެފައިވަނީ އެ އެޕްލިކޭޝަން ޖެނެރޭޓު ކުރާ ކިއުއާރު ކޯޑު ސްކޭން ކޮށްލުމުން ފިހާރައަށް ވަދެވޭނެ ކަމަށާއި ފިހާރައިން މުދާ ނަގަމުންދާވަރަކަށް އެ ފަރާތެއްގެ ބިލަށް އެ އެއްޗެއް އިތުރުވެ، ފައިސާ ކެނޑެމުންދާނެ ކަމަށެވެ. އެސްޓީއޯ ސްމާޓް ސްޓޯރުގެ ބޭރުގައި އެ ސްޓޯރުން ވިޔަފާރި ކުރެވޭނެ ގޮތް ދިވެހި ބަހާއި އިނގިރޭސިބަހުން އާންމުންނަށް އެނގޭނެ ގޮތަށް ކިޔާދީފައި ހުންނާނެ ކަމަށް އެ ކުންފުނިން ބުނެއެވެ.
އެސްޓީއޯއިން ބުނީ ސްމާޓް ސްޓޯގައި ނިއު އެމާޖިން ދެ ޓެކްނޮލޮޖީއެއް ބޭނުންކޮށްފައިވާ ކަމަށެވެ. އެއީ އާޓިފިޝަލް އިންޓެލިޖެންސްގެ ވިޝަން އާއި އައިއޯޓީ ބޭނުންކޮށްގެން ފިހާރައިގައި ކޭޝިއަރަކު ނެތި ކަސްޓަމަރު ވަދެ ޓްރާންސެކްޝަން ނިންމާފައި ނިކުމެގެންދާ ޕްރޮސެސް ކަމަށް އެ ކުންފުނިން ބުނެއެވެ.
އެސްޓީއޯއިން ބުނީ ކިއުއާރު ކޯޑު ބޭނުންކޮށްގެން އެ ސްޓޯރަށް ވަދެ ވިޔަފާރި ކުރުމުގެ އިތުރުން އެޕްލިކޭޝަނުގައި ހިމަނާފައިވާ ފޭސް ރިކޮގްނިޝަން ފީޗާގައި އެމީހެއްގެ މޫނު ރެޖިސްޓްރީ ކުރުމުން ފޯނު ނެތް ހާލަތުގައި މޫނު ސްކޭން ކޮށްލުމަށްފަހު، ވަދެ ވިޔަފާރި ކުރެވޭނެ ކަމަށެވެ.
