އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން ނ. އަތޮޅުގެ ރަށްތަކަށް މިއަދު ހެނދުނު ފެށި ކެމްޕެއިން ދަތުރުގައި ނ. މާޅެންދޫއަށް ވަޑަައިގެން އެ ރަށުގެ ސަޕޯޓަރުންނާ ބައްދަލުކުރައްވާ ރައީސް ވިދާޅުވީ ކުރިއަށް އޮތް ރިޔާސީ އިންތިހާބުގެ ނިންމުން މިހާރު ވަނީ މަސްދުވަހަށްވުރެ ކުޑަތަންވެފައި ކަމަށާއި މި އަހަރުގެ ރިޔާސީ އިންތިހާބުގައި އެންމެ ބޮޑު އަގުލަބިއްޔަތެއް ލިބޭނެ އަތޮޅެއްގެ ގޮތުގައި ނ. އަތޮޅުވެގެންދާނެ ކަމަށެވެ.
ރައީސް ވިދާޅުވީ ކެމްޕެއިން ކުރިއަށް ގެންދަންވީ ކަމަށާއި ކެމްޕެއިން ކުރިއަށް ގެންދިއުމުގައި ވާން ޖެހޭ ހުރިހާ އެހީތެރިކަމެއް ވާން ތައްޔާރަށް ތިބި ކަމަށެވެ. އެއްވެސް ކަމެއް ނުކުރެވި އޮވެގެން ވޯޓެއް ގެއްލުނު ކަމަށް ނުބުނާ ވަރަށް އެހީތެރިކަން ފޯރުކޮށްދޭނެ ކަމަށް ރައީސް ފާހަގަކުރެއްވިއެވެ.
ރައީސްގެ ވާހަކަފުޅުގައި ވަނީ މިދިޔަ ފަސް އަހަރު ދުވަހުގެ ތެރޭގައި މާޅެންދޫއަށް ކޮށްދީފައިވާ ކަންތައްތަކަށާއި ކުރެވެމުންދާ މަސައްކަތްތަކުގެ އިތުރުން ދެވަނަ ދައުރެއްގައި ކޮށްދެއްވާނެ ކަންތައްތަކުގެ މައްޗަށް އަލިއަޅުއްވާލައްވާފައެވެ.
