އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން ނ. އަތޮޅުގެ ރަށްތަކަށް ފެއްޓެވި ކެމްޕެއިން ދަތުރުގައި މިއަދު ހެނދުނު މާޅެންދޫއަށް ވަޑަައިގެން އެ ރަށުގެ ސަޕޯޓަރުންނާ ބައްދަލުކުރައްވާ ރައީސް ވިދާޅުވީ މާޅެންދޫގެ ރައްޔިތުން އެދިފައި ވަނީ ރަށުގެ ސިއްހީ މަރުކަޒު 16 ގަޑިއިރަށް ބަދަލުކޮށް، ލެބޯރެޓަރީއެއްގެ ހިދުމަތް ލިބޭނޭ ގޮތަށް ބަދަލުކޮށްދިނުމަށް ކަމަށާއި ކުރިއަށް އޮތް ދައުރުގައި އެ ރަށުގެ ސިއްހީ މަރުކަޒު 24 ގަޑިއިރަށް ބަދަލުކޮށް، ލެބޯރެޓަރީއެއް ގާއިމުކޮށްދޭނެ ކަމަށެވެ.
ގުޅިފައިވާ ޕާޓީތަކުގެ ސިޔާސަތުތައް ހާމަކުރަމުންދާއިރު، ކޮންމެ ރަށަކަށް ވަކިން އެ ރަށަކަށް ބޭނުންވާ ސިޔާސަތުތައް ހާމަކުރަމުންދާކަން ފާހަގަކުރައްވާ ރައީސް ވިދާޅުވެފައިވަނީ މާޅެންދޫ ބަނދަރުގެ މަސައްކަތް ކޮންޓްރެކްޓް ކުރެވިފައިވާ ކަމަށާއި ރައްޔިތުން ބޭނުންވާ ގޮތަށް ބަނދަރެއް ހެދިގެންދާނެ ކަމަށެވެ. ރަށުގެ މަގު ހެދުމާއި ފެން ހިންދުމުގެ ނިޒާމުގެ މަސައްކަތް ކުރިއަށް އޮތް ދައުރުގެ ތެރޭގައި ކޮށްދެއްވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި މާޅެންދޫގައި އައުޓްޑޯ ޖިމް ގާއިމުކޮށް ނިމިފައިވާ ކަމަށާއި ފުޓްސަލް ދަނޑު މަރާމާތުކޮށް ނިމިފައިވާ ކަމުގައެވެ. ރަށުގެ ފުޓުބޯޅަދަނޑު ތަރައްގީ ކުރުމަށް މިހާރު ޓެންޑަކުރެވިފައިވާ ކަމަށް ރައީސް ވިދާޅުވިއެވެ. ރައީސް ވިދާޅުވެފައިވަނީ ކުރިއަށް އޮތް ދައުރުގައި ޒުވާނުން ބޭނުންވާ ވޮލީކޯޓްވެސް އެ ރަށުގައި އަޅަައިދޭނެ ކަމަށެވެ.
