އުމަރު ވިދާޅުވީ އެބޭފުޅާގެ ވެރިކަމެއްގައި ރާއްޖޭގެ މަގުތައް އަމާންވާނެ ކަމަށާއި، މަގުމަތީގައި މަސްތުވާ ތަކެތި ވިއްކުމާއި، ވަޅިހެރުމާއި، ކަނޑި ހޫރުމާއި، ކަތިވަޅިއެއް ވެސް ނުގެންގުޅެވޭނެ ކަމަށެވެ.
އުމަރު މިހެން ވިދާޅުވީ ދައުލަތުގެ މީޑިޔާ (ޕިއެސްއެމް) ގެ "ރިޔާސީ ކެންޑިޑޭޓާއިއެކު" ޕްރޮގުރާމްގައި ވާހަކަ ދައްކަވަމުންނެވެ.
އުމަރު ނަސީރުގެ ކެންޕޭނު ޖަލްސާއެއްގައި ވާހަކަ ދައްކަވަމުން މީގެ ކުރިން އޭނާ ވިދާޅުވީ ދިވެހިރާއްޖޭގައި ހައްލަކީ އުމަރުކަމަށެވެ. އަދި އެކަން މިހާރު ޔަގީންކޮށްދީފައިވާ ކަމަށާއި، އޭނާގެ ހޯމް މިނިސްޓަރުކަން ލިބިވަޑައިގަތުމުން އެކަން ސާބިތުކޮށް ދެއްވާފައިވާ ކަމަށެވެ.
އުމަރު އޭރު ވިދާޅުވީ 43 ގޭންގު ލީޑަރުންގެ ފައިގައި ޓެގުއެޅުވި އެއްވެސް މިނިސްޓަރެއް އެނާ ނޫނީ ނުހުންނާނެކަމަށެވެ.
އުމަރު ރިޔާސީ އިންތިހާބުގައި ވާދަ ކުރައްވާއިރު އޭނާގެ ކެންޑިޑޭޓް ނަމްބަރަކީ، އެކެކެވެ. އޭނާގެ ރަނިން މޭޓެއްގެ ގޮތުގައި ހަމަޖައްސާފައިވަނީ އަހުމަދު ސަލީމު (މާޒް ސަލީމް) އެވެ.
