އުރީދޫ މޯލްޑިވްސްއިން ބުނީ ލަންދޫ ކައުންސިލްގެ ހިދުމަތްތަކަށް އެމް-ފައިސާ މެދުވެރިކޮށް ލަންދޫގެ ރައްޔިތުންނަށް ކޮންމެތާކު ކޮންމެ ވަގުތެއްގައިވެސް ފަސޭހަކަމާއި ރައްކާތެރިކަމާ އެކު ކައުންސިލަށް ދައްކަން ޖެހޭ ފައިސާ މިހާރު ދައްކާލެވޭނެ ކަމަށެވެ. އެމް-ފައިސާއަކީ ކޮންމެތާކު، ކޮންމެ ވަގުތެއްގައިވެސް ފައިސާ ޖަމާކުރުމާއި ފައިސާ ނެގުމާއި ޓްރާންސްފާ ކުރުމާއި ޖީއެސްޓީ ދެއްކުމުގެ އިތުރުން ކެފޭ، ރެސްޓޯރަންޓް، ފިހާރަފަދަ ތަންތަނަށް ފައިސާ ދެއްކޭ ޑިޖިޓަލް ވޮލެޓެއް ކަމަށް އުރީދޫން ބުނެއެވެ. އުރީދޫން ބުނެފައިވަނީ ސްޓެލްކޯ، އެމްޑަބްލިއުއެސްސީ، އުރީދޫގެ ހިދުމަތްތަކަށާއި މީޑިއާނެޓް ފަދަ ގިނަ ހިދުމަތްތަކަކަށް ބިލް ވެސް ދެއްކޭނެ ކަމަށެވެ.
ލަންދޫ ކައުންސިލްގެ ރައީސް، އަބްދުލްއަޒީޒު މުހައްމަދު ވިދާޅުވި ގޮތުގައި ރަށު ކައުންސިލުން އަބަދުވެސް އިސްކަން ދެނީ ހިދުމަތްތައް ފަސޭހަކޮށް، ރައްޔިތުންގެ ދިރިއުޅުން ކުރިއެރުވުމަށް ކަމުގައެވެ. އެގޮތުން ކައުންސިލުން ނަގަމުންދާ ޕްރީ ސްކޫލް ފީ، ކުނި ފީގެ އިތުރުން އަދިވެސް އެހެނިހެން ފީތައް އެމް-ފައިސާ މެދުވެރިކޮށް ބަލައިގަތުން ހަމަޖެހިގެން ދިއުމަކީ ކައުންސިލަށް ލިބިގެންދިޔަ ވަރަށް ބޮޑު ލުޔެއް ކަމަށް އަބްދުލްއަޒީޒު ވިދާޅުވިއެވެ. އަބްދުލްއަޒީޒު ވިދާޅުވީ ފައިސާގެ މުއާމަލާތްތައް އިތުރަށް ފަސޭހަކުރުމުގެ އިތުރުން އެކަމަކީ ލަންދޫ މުޖުތަމައުގައި ޑިޖިޓަލް ހިދުމަތްތަކަށް އަހުލުވެރިކުރުމުގެ ސަގާފަތެއް ޕްރޮމޯޓްވެގެންދާ ކަމެއް ކަމަށެވެ.
މި ޕާޓްނަޝިޕް އާއެކު ޑިޖިޓަލް ލުއިފަސޭހަކަން ކުރިއެރުވުމުގައި އުރީދޫ މޯލްޑިވްސްއިން ދޭ އަހައްމިއްޔަތުކަމުގެ އިތުރުން ޑިޖިޓަލް ހިދުމަތްތައް މެދުވެރިކޮށް ބާރުވެރި މުޖުތަމައެއް ގާއިމުކުރުމަށް ލަންދޫ ކައުންސިލްގެ ވިސްނުންވެސް ރަމްޒުކޮށްދޭ ކަމަށް އެ ކުންފުނިން ބުނެއެވެ.
