އެމްޑީޕީގެ ރިޔާސީ ކެންޑިޑޭޓުގެ ހައިސިއްޔަތުން އަރިއަތޮޅުގެ ރަށްތަކަށް ފެއްޓެވި ކެމްޕެއިން ދަތުރުފުޅުގައި މިއަދު ހެނދުނު އއ. ތޮއްޑޫއަށް ވަޑަައިގެން އެ ރަށުގެ ގުޅިފައިވާ ޕާޓީތަކަށް ތާއީދުކުރާ ފަރާތްތަކާ ބައްދަލުކުރައްވާ ދެއްކެވި ވާހަކަފުޅުގައި ރައީސް ވިދާޅުވެފައިވަނީ ވީ ވައުދުތައް ދަނީ ބަރާބަރަށް ފުއްދަމުން ކަމަށެވެ. ރައީސް ވިދާޅުވީ ވޭތުވެދިޔަ ފަސް އަހަރު ދުވަހުގެ ތެރޭގައި މިއިން ޒަމާނަކު ރާއްޖޭގެ ރަށްތައް ތަރައްގީ ކުރުމަށްޓަކައި ނުކުރާވަރުގެ ބިޔަ ބޮޑެތި މަޝްރޫއުތައް ކޮންމެ ރަށެއްގައިވެސް ހިނގަމުންދާ ކަމަށެވެ.

ރައީސް ވިދާޅުވި ގޮތުގައި 2018 ވަނަ އަހަރު ވެރިކަމަށް ކުރިމަތިލެއްވީ ޖަޒީރާ ރާއްޖޭގެ ތަސައްވަރަކާ އެކު ކަމަށާއި އެ ކަންތައްތައް ތަންފީޒުކުރުމުގެ މަސައްކަތް ކުރަމުން އަންނަ ކަމުގައެވެ. ވޭތުވެދިޔަ ތިން ހަފުތާގެ ތެރޭގައި ރާއްޖޭގެ ވަރަށް ގިނަ ރަށްރަށަަށް ވަޑައިގަންނަވާފައިވާކަން ފާހަގަކުރައްވާ ރައީސް ވިދާޅުވީ ކޮންމެ ރަަށަކުންވެސް ފެންނަނީ ތަރައްގީގެ ބޮޑެތި ބަދަލުތަކެއް ކަމަށެވެ. ރައީސް ވިދާޅުވެފައިވަނީ ވީ އެންމެ މުހިންމު އެއް ވައުދަކީ ލާމަރުކަޒީ ނިޒާމު އިސްލާހުކުރުން ކަމަށާއި އެކަމަށް ބޮޑު ބަދަލެއް ގެނެވިފައިވާ ކަމަށެވެ.

ރައީސް ސޯލިހު ތޮއްޑޫގައި ވާހަކަފުޅުދައްކަވަނީ - ފޮޓޯ:އުފާވެރި އަމާން ރާއްޖެ

ރައީސް ވިދާޅުވީ ކޮންމެ ރަށެއްގެ އިހުތިސޯސް ކަނޑައެޅުމުގެ މަސައްކަތާ އެކު، ކައުންސިލުގެ 33 އިންސައްތަ އަންހެނުންނަށް ކަށަވަރުކުރެވިފައިވާ ކަަމަށެވެ. ހުރިހާ ރަށަކަށް ފެނާއި ނަރުދަމާގެ ހިދުމަތްދިނުމުގެ މަސައްކަތްކޮށް، ނިމެމުންދާ ކަމަށް ރައީސް ވިދާޅުވިއެވެ. ރައީސް ވިދާޅުވެފައިވަނީ މިނިމަމް ވޭޖް ކަނޑައެޅި، ނިމިފައިވާ ކަމަށާއި ތަނަވަސް ބޯހިޔާވަހިކަން ހޯދައިދިނުމުގެ މަސައްކަތް މާލެ އާއި ރަށްތަކުގައި ކުރިއަށްދާ ކަމަށެވެ.

ދެވަނަ ދައުރެއްގެ އަމާޒަކީ ރައްޔިތުން ބޭނުންވާ ތަރައްގީގެ މަޝްރޫއުތައް ބާރު ސްޕީޑުގައި ކުރިއަށް ގެންދިއުން ކަމަށް ރައީސް ވިދާޅުވިއެވެ. ރައްޔިތުންގެ ކިބައިން އިތުބާރަށް އެދިވަޑައިގެން ރައީސް ވިދާޅުވީ ރިޔާސީ އިންތިހާބެއް ބޯމަތިވަމުން އަންނައިރު ތަފާތު ވައުދުތައް، ތަފާތު ކެންޑިޑޭޓުންވާނެ ކަމަށެވެ. އެހެންނަމަވެސް، މާޒީގައި ކަންވެފައި އޮތް ގޮތާއި މިހާރު ކަން ހިނގާ ގޮތް ރައްޔިތުން މިނެކިރަން ޖެހޭ ކަމަށް ރައީސް ވިދާޅުވިއެވެ.