ހުޅުމާލޭގައި އަޅާ ފުލެޓުތަކުގެ ޑައުންޕޭމެންޓުގެ ގޮތުގައި 92،000 ރުފިޔާ ނަގާފައިވާ ކަމަށާއި، އެއިރު ޑައުންޕޭމެންޓު ދެއްކި ސިފައިންގެ ތެރެއިން ބައެއް ފަރާތްތަކަށް ފުލެޓް ނުލިބޭކަމަށް ބުނެ ބައެއް މީޑިޔާ ތަކުން ރިޕޯޓް ކުރުމާއި ގުޅިގެން "ސީއެންއެމް" އިން ކުރި ސުވާލަކަށް ޖަވާބު ދެއްވަމުން މިނިސްޓަރު މާރިޔާ ވިދާޅުވީ އެއީ އެއްވެސް ހަގީގަތެއް ނެތް ދޮގު ވާހަކަތަކެއް ކަމަށެވެ. 

ގޯތި ގެދޮރުގެ މައްސަލަ އަކީ މާލެ ސަރަހައްދަށް އޮތް ބޮޑު މައްސަލައެއްކަން ފާހަގަ ކުރައްވައި މިނިސްޓަރު ވިދާޅުވީ ސިފައިންގެ ބޭކަލެއް ކަމުގައިވިނަމަވެސް ކުރިން ފުލެޓެއް ލިބިފައިވާނަމަ އަލުން ސިފްކޯގެ ފުލެޓު ލިބުމަކީ ނުވަތަ ދިނުމަކީ ގަބޫލުކުރެވޭނެ ކަމެއް ނޫން ކަމަށާއި، އެފަދަ ފަރާތެއް ވާނަމަ ފުލެޓު ލިބުމުގައި ޝަރުތު ހަމަނުވާނެ ކަމަށެވެ.

ސިފްކޯގެ ހައުސިން ފުލެޓް މަޝްރޫއުގެ މަސައްކަތް ނިންމައި ފުލެޓުތަކުން ފުލެޓު ލިބޭ ފަރާތްތަކަށް މި މަހުގެ ތެރޭގައި ވަދެވޭނެކަމަށް ސަރުކާރުން ފުލެޓު ލިބުނު ސިފައިންނަށް މިހާރު ވަނީ އަންގާފަ އެވެ. 

ހުޅުމާލޭގައި އަޅާ ފުލެޓުތަކުގެ ޑައުންޕޭމެންޓުގެ ގޮތުގައި 92،000 ރުފިޔާ ދައްކަން ޖެހެއެވެ. ސަރުކާރުން ވައުދުވެފައިވަނީ އެ ފުލެޓުތައް 18 މަސްދުވަހުގެ ތެރޭގައި ނިންމުމަށެވެ. ނަމަވެސް މަސައްކަތް ހަވާލުކުރި ކުންފުނިތަކަށް މަސައްކަތް ނުކުރެވި އެ މަސައްކަތް 10 އަހަރާ ގާތްކުރާ މިންވަރަކަށް ދިގުލައިގެން ގޮސްފައިވެއެވެ.