ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހީމްގެ ކެމްޕޭނަށް ހއ.އަށާއި ހދއަށް އެ ޕާޓީން ކުރަމުން ގެންދާ ދަތުރުގައި ހދ.ނޮޅިވަރަމުގައި ހުންނަވައިގެން ވާހަކަފުޅު ދައްކަވަމުން ރައީސް ވަހީދު ވިދާޅުވީ ކޮންމެ ގޮތަކަށް ބެލި ނަމަވެސް ރިޔާސީ ރޭހުގައި ތިބި ފަރާތްތަކުގެ ތެރެއިން ރާއްޖޭގެ ވެރިކަމަށް އެންމެ ގާބިލު ބޭފުޅަކީ ގާސިމް ކަމަށެވެ.
ހިޔާލުފާޅު ކުރުމުގެ މިނިވަންކަމާއި ހައްގުތައް ހޯއްދަވައި ދެއްވުމުގައި ވެސް ގާސިމު އިސް ދައުރެއް އަދާ ކުރެއްވި ކަމަށާއި ތަޖުރިބާއަށް ބެލި ނަމަވެސް މުޅި ދައުލަތާއި ސަރުކާރުގެ ވެސް އެހާ މުހިއްމު މަގާމުތަކެއް އަދާކުރެއްވި ބޭފުޅަކު ނެތް ކަމަށް ޑރ.ވަހީދު ވިދާޅުވިއެވެ. އެގޮތުން އެމްއެމްއޭގެ ގަވަރުނަރުކަމާއި ފިނޭންސް މިނިސްޓަރުކަން ވެސް ގާސިމު އަދާކުރެއްވިކަން ޑރ.ވަހީދު ފާހަގަ ކުރެއްވިއެވެ.
ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވުމަށްފަހު ރައީސް ވަހީދުގެ ދުވަސްވަރު ވެސް އެންމެ ބޮޑު އެހީތެރިކަމަކާ އެއްބާރުލުމެއް ދެއްވި ބޭފުޅަކީ ގާސިމު ކަމަށް އެމަނިކުފާނު ވިދާޅުވިއެވެ. 2008 ގެ ފަހުން ރާއްޖޭގައި އުފެދުނު ކޮންމެ ސަރުކާރެއް ގެނައުމުގައި ވެސް ގާސިމު އިބްރާހީމު ބައިވެރިވެވަޑައިގެންނެވި ކަމަށާއި ގާސިމު އަބަދު ވެސް ހުންނެވީ ރައްޔިތުންގެ ހައްގުގައި ކަމަށް ރައީސް ވަހީދު ވިދާޅުވިއެވެ.
