ރައީސް ވަހީދު ޖޭޕީގެ އިވެންޓެއްގައި ވާހަކަފުޅު ދައްކަވަނީ---
ރައީސް ވަހީދުގެ ބަހުގެ ހަމަލާތައް އަނެއްކާ ވެސް ޑރ. މުއިއްޒަށް!
އިބްރާހިމް މާރިފް
20 އޯގަސްޓް 2023 - 18:26:39
އިދިކޮޅު އެންމެ ބޮޑު ޕާޓީ ޕީޕީއެމްގެ ކުލަ ހުރި ނަމަވެސް އެ ޕާޓީގެ ކެންޑިޑޭޓަކު ނެތް ކަމަށާއި ޑރ.މުހައްމަދު މުއިއްޒަކީ އޮޅުވާލައިގެން ހުރި މީހެއް ކަމަށް ކުރީގެ ރައީސް ޑރ.މުހައްމަދު ވަހީދު ހަސަން މަނިކު ވިދާޅުވެއްޖެއެވެ.
ޖޭޕީގެ ކެމްޕޭނުގައި މިއަދު ށ.ފުނަދޫގައި ވާހަކަ ދައްކަވަމުން ރައީސް ވަހީދު ވިދާޅުވީ ޕީޕީއެމަކީ އިދިކޮޅު އެންމެ ބޮޑު ޕާޓީ ކަމަށެވެ. އަދި ޕީޕީއެމުގެ ކުލަ ހުރި ނަމަވެސް އެ ޕާޓީގެ ފަރާތުން ހުންނެވި ކެންޑިޑޭޓު ޑރ. މުއިއްޒަކީ އެ ޕާޓީގެ ޕީޕީއެމުގެ ކެންޑިޑޭޓެއް ނޫން ކަމަށް ރައީސް ވަހީދު ވިދާޅުވިއެވެ.
ރައީސް ވަހީދު ވިދާޅުވީ އެޕާޓީ ތަމުސީލު ކުރައްވަން ހުންނެވީ އެމަނިކުފާނު ކަމަށާއި ނަމަވެސް މަކަރާ ހީލަތުން އެފުރުސަތު ނިގުޅައިގަނެފައިވާ ކަމަށެވެ.
"އަޅުގަނޑަށް ދައްކަވާ ބައްލަވާ ޕީޕީއެމުގެ ކެންޑިޑޭޓެއް. އަޅުގަނޑު ހުރީ ޕީޕީއެމުން ނުކުންނަން. އެފުރުސަތު ނުދެއްވި. ވޯޓުލުމުގެ ފުރުސަތު ވެސް ނުދިނީ. ޕީޕީއެމުގެ ކެބިނެޓު، ޕީޕީއެމުގެ ސެނެޓު ބާއްވައިގެން ވޯޓުލާފައި ހުރި ކެންޑިޑޭޓެއް ނެތް މިއަދަކު،" ރައީސް ވަހީދު ވިދާޅުވިއެވެ.
ރައީސް ވަހީދުވަނީ ޑރ.މުއިއްޒު ހުންނެވި މަކަރު ހަދާ އޮޅުވާލައިގެން ކަމަށް ވިދާޅުވެ މުއިއްޒަށް ވޯޓު ނުދެއްވުމަށް އިލުތިމާސް ކުރައްވާފައެވެ.
"ޕީއެންސީގެ ކުލަ. އަޅުގަނޑަކަށް ނުފެނޭ ޕީއެންސީގެ ކުލައެއް. އެކަމަކު ޕީޕީއެމުގެ ކުލަ ހުރީ. ޕީޕީއެމުގެ ކެންޑިޑޭޓެއް ނެތޭ. މީ ކިހާ ބޮޑު އޮޅުވާލުމެއްތޯ. މިހާ ބޮޑު އޮޅުވާލުމާ މަކަރާ ހީލަތުން، ވެރިކަމަށް އަންނަން މަސައްކަތް ކުރާ މީހުން އަދި ވެރިކަމަށް ގެނައިމަ ކިހާ ބޮޑު މަކަރެއްތޯ ހަދާނީ،" ރައީސް ވަހީދު ވިދާޅުވިއެވެ.
ކުރިއަށް އޮތް ރިޔާސީ އިންތިހާބުގައި ރައްޔިތުންނަށް އިހުލާސްތެރި ކަމެއް ހުރި ހަމައެކަނި ކެންޑިޑޭތަކީ ގާސިމު ކަމަށް ވެސް ރައީސް ވަހީދު ވިދާޅުވިއެވެ.
62%
ކަމުގޮސްފި
23%
އަޑުއެހިތާ މިހުރީ
15%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް
