ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމު އިބްރާހީމުގެ ކެމްޕޭނަށް ރޭ ނ.މަނަދޫގައި ބޭއްވި ޖަލުސާގައި ވާހަކަފުޅު ދައްކަވަމުން ރައީސް ވަހީދު ވިދާޅުވީ އެއްބަޔަކު އެމަނިކުފާނަށް "ކާޅަށް" ގޮވާއިރު އަނެއް ބަޔަކު އެމަނިކުފާނަށް "ބާޒަށް" ގޮވަނީ ކަމަށެވެ. އަދި އެމަނިކުފާނު ދައްކަވާ ވާހަކަތައް ވެސް ގަބޫލުނުކޮށްފާނެ ކަމަށް ރައީސް ވަހީދު ވިދާޅުވިއެވެ.
ކުރީގެ ރައީސް މުހައްމަދު ނަޝީދު އިސްތިއުފާ ދެއްވުމުން ރާއްޖޭގެ ވެރިކަމާ ހަވާލުވެވަޑައިގެންނެވީ ވަރަށް ނާޒުކު ފައްތަރެއްގައި ކަމަށާއި މުޅި ގައުމުގައި އޮތީ ހަމަނުޖެހުން ކަމަށް ރައީސް ވަހީދު ވިދާޅުވިއެވެ. އެ ހަމަނުޖެހުމުގެ ތެރެއިން ހިޔާލު ތަފާތު އެތައް ބަޔަކު ގޮވައިގެން މަސައްކަތް ކުރެއްވީ އަމިއްލަ ޕާޓީ ބޮޑުކޮށް އަމިއްލަ މަންފާއެއް ހޯއްދެވުމަށް ނޫން ކަމަށް ރައީސް ވަހީދު ވިދާޅުވިއެވެ.
ރައީސް ވަހީދު ވިދާޅުވީ ދިވެހިންގެ މައި އެއާރޕޯޓު ދިވެހިންނަށް އަނބުރާ ހޯދައިދިނީ އެބޭފުޅާ ކަމަށާއި މާލެ-ހުޅުމާލެ ބުރިޖަކީ ވެސް ޗައިނާގެ ބޮޑު ވަޒީރާއެކު ރައީސް ވަހީދު ބޭއްވި ބައްދަލުވުމެއްގައި ހަމަޖެހިގެން ދިޔަ މަޝްރޫއެއް ކަމަށެވެ.
ރައީސް ވަހީދު ވިދާޅުވީ މާލެ ހުޅުމާލެ ބުރިޖަކީ ވެސް ފުރަތަމަ އެމަނިކުފާނު ޗައިނާއަށް ވަޑައިގެން ބޭއްވި މަޝްވަރާތަކުގައި އެއްބަސްވެވުނު މަޝްރޫއެއް ކަމަށެވެ.
އޭގެއިތުރުން ރާއްޖޭގައި އޮތް އެންމެ ދިގު މަގު ލ.އަތޮޅުގެ ލިންކު ރޯޑަކީ އެމަނިކުފާނު ހަމަޖެއްސެވި މަޝްރޫއެއް ކަމަށް ރައީސް ވަހީދު ވިދާޅުވިއެވެ.
