ދަރުބާރު ގޭގައި އެމްޑީޕީގެ އިގްތިސާދީ ބޮޑު ބަދަލު ސިޔާސަތު ލޯންޗު ކުރުމަށް މިރޭ ބޭއްވި ރަސްމިއްޔާތުގައި ފައްޔާޒު ވިދާޅުވީ ރައީސް އިބްރާހީމު މުހައްމަދު ސޯލިހު ވެރިކަމަށް ވަޑައިގެންނެވުމާއެކު އިދިކޮޅު ފަރާތްތަކުން ރާއްޖެ "ދަރާނީ" ކަމަށް ކިޔަން ފަށައިފި ކަމަށެވެ.
ފައްޔާޒު ވިދާޅުވީ މިއަދާ ހަމައަށް ރާއްޖެ އައިއިރު ރާއްޖެ ދަރާފައިނުވާ ކަމަށާއި، ކޮވިޑުގައި އެހެން ބައެއް ގައުމުތައް ބަނގުރޫތުވި އިރު ވެސް ރާއްޖެ ނުދަރާ ކަމަށެވެ.
ފައްޔުާޒު ވިދާޅުވީ ވޭތުވެ ދިޔަ ފަސް އަހަރު ސަރުކާރުން ކުރަން ޖެހުނީ އެތައް ޒަމާންތަކެއް ވަންދެން ބަޔަކު ހާވާފައި ހުރި ހަޑިތައް ރަނގަޅުކޮށް އިސްލާހު ކުރުން ކަމަށެވެ. އެގޮތުން ދިވެހި ރައްޔިތުންނަށް ގައިން ތާހިރުވާނެ ގޮތް ހޯދާ ދެވިއްޖެ ކަމަށާއި ސިއްހީ ދާއިރާއާއި އެހެނިހެން ދާއިރާތައް ރަނގަޅު ކުރުމަށް އެތައް އިންވެސްޓެއް ކުރެވިއްޖެ ކަމަށެވެ. އެ ހުރިހާ އިންވެސްޓަކާއެކު ވެސް ރާއްޖެ ނުދެރި ކަމަށް ފައްޔާޒު ވިދާޅުވިއެވެ.
ފައްޔާޒު ވިދާޅުވީ ރާއްޖެ ދަރާނެ ކަމަށް އިދިކޮޅު ދައްކަމުންދާ ވާހަކަ އަމާޒުވަނީ އެފަރާތްތަކަށް ކަމަށާއި ރައީސް ސޯލިހުގެ ޒައާމަތުގައި ރާއްޖެ ނުދަރާކަން ސާބިތުކޮށްދެވިއްޖެ ކަމަށެވެ. އަދި ކުރިއަށް ރާވާފައިވާ ކަންތައްތަކާއެކު ވެސް ރާއްޖެ ނުދަރާ އުފާވެރި އަމާން ރާއްޖެއަކަށް ގެންދެވޭނީ ރައީސް ސޯލިހާއެކު ކަމަށެވެ.
