ހުޅުމާލެ ފޭސް 2 ގައި ބޭއްވި އެމްޑީޕީގެ ހާއްސަ ކެމްޕެއިން ހަރަކާތެއްގައި ފައްޔާޒް ވިދާޅުވީ، ސަރުކާރުން ސަބްސިޑައިޒް ކޮށްގެން، ދޫކުރާ ފްލެޓް ތަކަކީ ދިރިއުޅުމުގެ ބޭނުމަށް، ބޯހިޔާވަހިކަން ހޯދާދިނުމަށްޓަކައި ދޫކުރާ ފްލެޓްތައް ކަމަށާއި، ރައްޔިތުންގެ ޓެކްސް ފައިސާއިން ހަރަދުކޮށްގެން ހަދާ ފްލެޓްތައް ދެވެނީ، ލިބޭ ފަރާތްތަށް މުއްސަދިވާކަށް ނޫން ކަމަށެވެ.
ފައްޔާޒް ވިދާޅުވީ، އެގޮތަށް ދޫކުރެވޭ ފްލެޓްތަކުގައި، ލިބުނު ފަރާތް ނޫން އެހެންފަރާތްތަކެއް ދިއިއުޅޭނަމަ، ނޫނީ ކުއްޔަށް ދޫކުރާނަމަ، ކޮންމެވެސް މިންގަޑެއްގެ ތެރެއިން އެކަން ކުރެވިދާނެގޮތަކަށް ސިޔާސަތު ބަދަލުކުރުމުގެ ވިސްނުމެއް ސަރުކާރުގަ އެބައޮތް ކަމަށެވެ.
އެއީ، އެތަންތަނަށް ދެންވެސް ވަންނާނީ ހަމަ ބޯހިޔާވަހިކަން ހޯދުމަށް ބޭނުންވާ މީހުންނަށްވާތީވެ، ބޯހިޔާވަހިކަން ހޯދުމަށް ވަންނަ މީހާ ދައްކަން ޖެހޭ އެއްޗަކީ، ކޮންމެވެސް މިންގަޑެއްގެ ތެރެއިން ކޮންޓްރޯލްވާން ޖެހޭ އެއްޗަކަށްވާންޖެހޭ އެއްޗެއްކަމަށް ސަރުކާރުން ގަބޫލުކުރާތީ ކަމަށްވެސް ފައްޔާޒް ވިދާޅުވިއެވެ. އަދި މިއާއެކު، އެފުރުސަތު އެގޮތަށް ހުޅުވާލާއިފިނަމަ، ދިރިއުޅުމަށް ކުއްޔަށްދޫކުރާ ފްލެޓް ލިބުނު ފަރާތަށް އެތަނުގައި ވިޔަފާރިއެއް ކޮށް އާމްދަނީއެއް ލިބުމުގެ ފުރުސަތުވެސް ފަހިވާނެކަމެއް ކަމަށް ސަރުކާރަށް ގަބޫލުކުރެވޭތީ ކަމަށްވެސް ފައްޔާޒް ވިދާޅުވިއެވެ.
މިހެންކަމުން ކުރިއަށް އޮތް ސަރުކާރުގައި، އެކަމަށް ވިސްނަވާ، ކަމާއި ގުޅުންހުރި ހުރިހާ ފަރާތްތަކާއި މަޝްވަރާކުރުމަށްފަހު، ހުރިހާ އެއްމެންނަށް އެއްމެ ފައިދާހުރި ގޮތަކަށް އެކަން ނިންމަވާނެކަމަށް ފައްޔާޒް ވިދާޅުވިއެވެ.
ހުޅުމާލޭގައި އަޅާފައިވާ ފްލެޓްތަކުގައި، ފްލެޓް ލިބުނު ފަރާތްތައް ނޫން އެހެން ފަރާތްތަކުން ކުއްޔަށް އުޅުމަކީ އާބަންކޯ އިން ހުއްދަކުރާ ކަމެއް ނޫނެވެ. އެހެންނަމަވެސް، މިހާރުވެސް، ވަރަށް ގިނަ ފަރާތްތަކަކުން، ފްލެޓްތައް ލިބުނު ފަރާތްތަކުގެ އަތުން އެތަންތަން ކުއްޔަށް ނަގައިގެން ދިރިއުޅުމަށް ބޭނުންކުރާކަން ފާހަގަކުރެވެއެވެ.
