Advertisement

މިއަދު ހަވީރު 'ހިޔާ ތެރަޕީ އެންޑް އިންޓަވެންޝަން ސެންޓަރު' ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާގެ ނައިބު ފައިސަލް ނަސީމެވެ.

ހިޔާ ތެރަޕީ އެންޑް އިންޓަވެންޝަން ސެންޓަރަކީ އެ ސޮސައިޓީ އާއި އާބަންކޯ ގުޅިގެން ހުޅުމާލޭގައި ހާއްސަކޮށް އުތުރު ހުޅުމާލޭގައި ދިރިއުޅޭ ނުކުޅެދުންތެރިކަން ހުންނަ ފަރާތްތަކަށް ބޭނުންވާ ތެރަޕީ އަދި އެހެނިހެން ފަރުވާ ފޯރުކޮށްދިނުމަށް ހުޅުވުނު ހާއްސަ ސެންޓަރެއް ކަމަށް ކެއާ ސޮސައިޓީން ބުނެއެވެ.

ކެއާ ސޮސައިޓީން ބުނީ ނުކުޅެދުންތެރިކަން ހުންނަ ފަރާތްތަކަށް އެންމެ އެކަށޭނަ ގޮތަކަށް ހިދުމަތްތައް ފޯރުކޮށްދިނުމަށްޓަކައި މި ސެންޓަރު މަރާމާތު ކުރުމާއި ބޭނުންވާ ފަރުނީޗަރާ އަދި އެހެނިހެން ތަކެތި ފޯރުކޮށްދެއްވާފައިވަނީ ހެޔޮއެދޭ އެކިއެކި ފަރާތްތަކުން ކަމަށެވެ. އެ ސޮސައިޓީއަށް އެހީތެރިކަން ފޯރުކޮށްދިން ފަރާތްތަކަށް ޝުކުރު އަދާކޮށް ކެއާ ސޮސައިޓީން ބުނީ އެ ފަދަ ފަރާތްތަކުން އެ ސޮސައިޓީ އާ އަބަދުވެސް ބާއްވާ ގާތް ކަމަކީ ސޮސައިޓީގެ ޓީމަށް ސާބިތުކަމާ އެކު ކުރިއަށް ދިއުމަށް ލިބޭ ވަރަށް ބޮޑު ހިތްވަރެއް ކަމަށެެވެ.

ހިޔާ ތެރަޕީ އެންޑް އިންޓަވެންޝަން ސެންޓަރުން ލިބެން ހުންނާނެ ހިދުމަތްތަކުގެ ތެރޭގައި:

• ޅަފަތުގައި ނުކުޅެދުންތެރިކަން ދެނެގަތުމާއި އެކަމަށް ބޭނުންވާ ފަރުވާ - މިއީ ކުއްޖާގެ އުމުރުން ވީހާވެސް ޅަފަތުގައި ހެދިބޮޑުވުމުގެ މަރުހަލާތަކަށް އަންނަ ލަސްކަން ވީހާވެސް އަވަހަށް ދެނެގަނެ އެކަމަށް ބޭނުންވާ ފަރުވާ ފޯރުކޮށްދިނުން. މި ޕްރޮގްރާމް މިހާރު ކެއާ ސޮސައިޓީގެ މާލެ، ހުޅުމާލެ އަދި މާލޭގެ ތިން ޕްެރީ ސްކޫލެއްގައި ކުރިއަށް ގެންދެވޭ.
• އެކަޑެމިކް އެންހޭންސްމަންޓް - މިއީ ރަސްމީ ތައުލީމީ ނިޒާމުގެ ތެރެއިން ސްކޫލަށް ދާ ކުދިންގެ ތެރެއިން އިތުރު އެހީ ބޭނުންވާ ކުދިންނަށް ގައުމީ މުގައްރަރާ އެއްގޮތަށް ވަކިވަކި މާއްދާތަކުން ފޯރުކޮށްދޭން ޖެހޭ އިތުރު އެހީ ފޯރުކޮށްދިނުމަށް ހިންގޭ ޕްރޮގްރާމެއް.
• ރެޑިނަސް ފޮ އެމްޕްލޯއިމަންޓް/ޖޮބް - މި ޕްރޮގްރާމަކީ ކުދިންނަށް ވޮކޭޝަނަލް މަސައްކަތް ދަސްކޮށްދިނުމާ އަދި އާމްދަނީ ހޯދުމަށް މަސައްކަތެއް ދަސްކޮށްދިނުމަށް ނުވަތަ ކުދިން ވަޒީފާއަށް ނެރުމަށް ހިންގޭ ޕްރޮގްރާމެއް.
• ތެރަޕީ ޕްރޮގްރާމް - މިއީ ކުދިންނަށް ބޭނުންވާ ކްލިނިކަލް އެސެސްމަންޓް، ކައުންސެލިން އާ ތެރަޕީ ފޯރުކޮށްދިނުމުގެ ގޮތުން ހިންގޭ ޕްރޮގްރާމެއް.