ރައީސް ސޯލިހު އެކަންކަމަށް ވައުދުވެވަޑައިގެންފައިވަނީ މިރޭ ތިމަރަފުށީގައި ބޭއްވި ޖަލުސާގައި ވާހަކަފުޅު ދައްކަވަމުންނެވެ.
ރައީސް ސޯލިހު ވިދާޅުވީ ތިމަރަފުށީގެ ރައްޔިތުން ބޭނުންވާ ގޮތަށް ހިރިޔަންފުށީގައި ސިޓީ ހޮޓަލެއް ހެދުމަށް ހުޅުވާލައްވާނެ ކަމަށެވެ. އަދި ތިމަރަފުށި ކައިރީގައި އޮންނަ ކަށިމީދޫގައި ރިސޯޓެއް ތަރައްގީ ކުރުމަށް ހުޅުވާލައްވާނެ ކަމަށް ރައީސް ސޯލިހު ވިދާޅުވިއެވެ.
ތިމަރަފުށި ކައިރީގައި އޮންނަ ފުނައްޑޫ އޮޕަރޭޝަނަށް ގެނެސް އެރަށުން މަސްވެރިންނަށް ބޭނުންވާ ތެލާއި، އައިސް ލިބޭނެ އިންތިޒާމު ހަމަޖައްސަވާ ދެއްވާނެ ކަމަށް ރައީސް ސޯލިހު ވައުދުވެވަޑައިގެންނެވިއެވެ. އޭގެއިތުރުން ތިމަރަފުށީގައި މިނީ ހޮސްޕިޓަލެއް އަޅައި ދިނުމަށާއި، ތިމަރަފުށީގެ މަގުތައް ހަދައި ދެއްވުމަށާއި، ބަނދަރު ބޮޑުކޮށް ވަސީލަތްތައް ފުރިހަމަކޮށްދެއްވާނެ ކަމަށް ވެސް ރައީސް ސޯލިހު ވައުދުވެވަޑައިގެންނެވިއެވެ.
ތިމަރަފުށީގައި މިރޭ ވާހަކަފުޅު ދައްކަވަމުން ރައީސް ސޯލިހުވަނީ 2018 ވަނަ އަހަރު އެމަނިކުފާނު ކެމްޕޭނަށް ތިމަރަފުއްޓަށް ވަޑައިގެންނެވި ދަތުރުފުޅުގެ ހަނދާން އާ ކުރައްވާފައެވެ. ރައީސް ސޯލިހު ވިދާޅުވީ މިހާރު ވެސް ތިމަރަފުށިން ފެންނަނީ 2018 ވަނަ އަހަރު އޮތް ރޫހު ކަމަށެވެ. 2018 ވަނަ އަހަރު އެމަނިކުފާނު ތިމަރަފުއްޓަށް ވަޑައިގެންނެވި އިރު އެދާއިރާގެ މިހާރުގެ މެންބަރު އަބްދުﷲ ރިޔާޒު ހުންނެވީ ހައްޔަރުގައި ކަމަށް ރައީސް ސޯލިހު ވިދާޅުވިއެވެ.
އިންތިހާބު ދެވަނަ ބުރަކަށް ގެންދިއުމަށް ފުރުސަތު ނުދިނުމަށް މިރޭ ވެސް ރައީސް ސޯލިހުވަނީ ގޮވާލައްވާފައެވެ.
