ރައީސް ސޯލިހު އެކަންކަމަށް ވައުދުވެވަޑައިގެންފައިވަނީ އެމަނިކުފާނު މިއަދު ލ.އަތޮޅަށް ކުރެއްވި ދަތުރުފުޅުގައި ލ.ކަލައިދޫއާއި، ލ.ދަނބިދޫގައި ވާހަކަފުޅުދައްކަވަމުންނެވެ.
ކަލައިދޫގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އިތުރު އެއާޕޯޓެއް އަޅައިދިނުމަކީ އިސްދޫގެ ރައްޔިތުން ވެސް އެދޭ އެދުމެއް ކަމަށެވެ. އިތުރު އެއާޕޯޓެއް ލ.އަތޮޅުގައި އަޅާނީ ކޮން ރަށެއްގައިކަން އަދި ނިންމާފައި ނުވި ނަމަވެސް ބަލަންޖެހޭ ބެލުންތައް ބެލުމަށްފަހު ކުރިއަށް އޮތް ދައުރުގައި އެއާޕޯޓު އަޅައިދެއްވާނެ ކަމަށް ރައީސް ސޯލިހު ވިދާޅުވިއެވެ.
އޭގެއިތުރުން ދަނބިދުއަށް ވަޑައިގެން ވާހަކަފުޅު ދައްކަވަމުން ރައީސް ސޯލިހު ވަނީ ލ.އަތޮޅުގައި ޓޫރިޒަމު ފުޅާކޮށް ދިނުމަށް ވައުދުވެވަޑައިގެންފައެވެ. ރައީސް ވިދާޅުވީ ލ.އަތޮޅުގައި ފަތުރުވެރިކަން އިތުރަށް ފުޅާވާން ޖެހޭ ކަމަށާއި އެ އަތޮޅުގެ ތިން ވަރަކަށް ރަށް ބިޑަށް ހުޅުވާލައިގެން މާބޮޑު ސަމާލުކަމެއް ލިބިފައި ނުވާ ކަމަށެވެ. ނަމަވެސް ކުރިއަށް އޮތް ތަނުގައި އިތުރު ރަށްތަކެއް ވެސް ހުޅުވާލައްވާނެ ކަމަށާއި އެ ރަށްތަކަށް އިންވެސްޓު ކުރާނެ އިންވެސްޓަރުން ހޯދޭނެ ކަމަށް ގަބޫލު ކުރައްވާ ކަމަށެވެ.
ރައީސް ސޯލިހު ވިދާޅުވީ ލ.އަތޮޅުގައި ފަތުރުވެރިކަން ފުޅާ ކުރުމަށް ސަރުކާރުން ދޭން ޖެހޭ އެއްބާރުލުން ދޭނެ ކަމަށާއި އެކަން ކުރަން ބޭނުންވާ ފަރާތްތަކަށް ސަރުކާރުން ފަސޭހަ ކޮށްދޭނެ ކަމަށެވެ.
