ވަޔެކާނޯގެ އެސްޓާޑިއޯ ޑި ވަޔެކާސްގައި ކުޅުނު މި މެޗު ނިމުނީ 7-0 އިން އެތުލެޓިކޯ މޮޅު ވެގެންނެވެ. މި މެޗުގައި އެތުލެޓިކޯގެ ލަނޑުތައް ޖެހީ އެންޓޮއިން ގްރީޒްމަން، މެމްފިސް ޑިޕާއީ، ނަހުއެލް މޮލީނާ އަދި އަލްވާރޯ މޮރާޓާގެ އިތުރުން އެންހެން ކޮރެއާ އަދި މާކޯސް ލޮރެންޓޭއެވެ. މެޗުގައި މޮރާޓާ ދެލަނޑު ޖެހިއެވެ.
މިއީ އެތުލެޓިކޯއިން އަވޭ މެޗެއްގައި އެންމެ ބޮޑު ތަފާތަކުން ޓީމެއް ބަލިކުރި ނަތީޖާއެވެ. މީގެ އިތުރުން މިއީ ލަލީގާގެ މެޗެއްގައި އެތުލެޓިކޯއިން ހަތް ލަނޑު ޖެހި ދެވަނަ ފަހަރެވެ. އެޓީމުން ވަނީ 2013 ވަނަ އަހަރު ގެޓާފޭ ކޮޅަށް ހަތް ލަނޑު ޖަހާފައެވެ.
މި ނަތީޖާއާއެކު އެތުލެޓިކޯ ވަނީ ލީގު ތާވަލުގެ ދެވަނަ މަގާމަށް ޖެހިލާފައެވެ. ނުވަ ޕޮއިންޓާއެކު ތާވާލުގެ އެއްވަނާގައި އޮތީ ރެއާލް މެޑްރިޑެވެ. އެތުލެޓިކޯއަށް ލިބެނީ ތިން މެޗުން ހަތް ޕޮއިންޓެވެ. އެޓީމު ވަނީ އެއް މެޗުން އެއްވަރުވެ، އަނެއް ދެމެޗުން މޮޅުވެފައެވެ.
މެޗުން ބަލިވި ވަޔެކާނޯ އޮތީ ތާވަލުގެ އަށްވަނާގައެވެ. އެޓީމަށް ތިން މެޗުން ލިބުނީ ހަ ޕޮއިންޓެވެ. މީގެ ކުރިން ކުޅުނު ދެމެޗުވެސް އެޓީމު ކާމިޔާބު ކުރިއެވެ.
