ރިޔާސީ ކެމްޕޭނުގައި ވާދަވެރިން އުޅެނީ އެންޑްރޮއިޑް ފޯނެއް އުޅޭގޮތަށް އުޅޭގޮތަށް އެމަނިކުފާނުގެ ފަހަތުން ކަމަށް ރައީސުލްޖުމްހޫރިއްޔާ އިބްރާހިމް ސޯލިހް ވިދާޅުވެއްޖެއެވެ.
Advertisement
ރައީސް މިގޮތަށް ވިދާޅުވީ ރިޔާސީ ކެމްޕޭނުގައި ޅ. އޮޅުވެލިފުށީގައި ވާހަކަފުޅު ދައްކަވަކުންނެވެ.
"އަޅުގަނޑު އަހާލިން އެމްޑީޕީގެ ޔޫތް ވިންގް ކުދިން ކައިރިން މިކެމްޕޭނާ ދޭތެރޭ ކިހިނެއްތޯ ދެކެނީ؟ އެކުދިން ބުނަނީ މޮބައިލް ފޯނު މާކެޓުގައި އެޕަލްއާ އެންޑްރޮއިޑް ގޮތަށޭ ފެންނަނީ. އެޕަލް އިން 3 ކެމެރާލީ ފޯނެއް ނެރޭ ވާހަކަ އިއުލާން ކޮށްލާއިރަށް އޭގެ ދުވަސްކޮޅެއް ފަހުން އެންޑްރޮއިޑްއިން އިއުލާން ކޮށްލަޔޭ 4 ކެމެރާލީ ފޯނެއް ނެރޭނެކަމަށް. އެގޮތަށޭ ފެންނަނީ،" ރައީސް ވިދާޅުވިއެވެ.
ރައީސް ފާހަގަކުރެއްވި ގޮތުން އެމްޑީޕީން މީގެ ދުވަސްކޮޅެއް ކުރިން ރޯދަ މަހުގެ 10 ދުވަސް ގޭގައި ތިބެގެން މަސައްކަތް ކުރެވޭނެގޮތް ހަދަން ވައުދެއްގެ ގޮތުގައި އިއުލާނުކުރިއެވެ. އަދި ހަމަ އެ ވައުދުވެސް ކޮޕޯކޮށް ރޯދަ މަހުގެ ފަހު 10 ބަންދުކުރަން ޕީއެންސީން ވެސް ވަނީ ވައުދުވެފައެވެ.
"ހަމަ އެގޮތަށް ކޮންމެވެސް ބޭފުޅަކު އިއުލާން ކޮށްލަފާނެ ކޮންމެވެސް ރަށެއްގައި 1200 މީޓަރުގެ އެއާޕޯޓެއް އަޅަން. އެކަމަކު މިހާރުވެސް އަސްލަމް އެ ރަށުގައި 1600 މީޓަރުގެ އެއާޕޯޓެއް އެޅުމުގެ މަސައްކަތް ކުރިޔަށް އެބަގެންދޭ އިނގޭތޯ. " ރައީސް ވިދާޅުވިއެވެ.
ރައީސްގެ ވާހަކަ ފުޅުގައި އޮޅުވެލިފުށްޓަކީ އެމަނިކުފާނު ގިނަ ދުވަސްތަކެއްގައި މަޖިލީސް ތަމްސީލް ކުރެއްވި ފަރާތެއް ކަމުގައި ފާހަގަކުރެއްވިއެވެ. އޭރުވެސް އެމަނިކުފާނާއި އެކީ ތިއްބެވި ބައެއް ބޭފުޅުން މިއަދުވެސް ފެންނަން ތިބިކަމަށާއި އަބަދުވެސް އޮޅުވެލިފުށީ ރައްޔިތުންނަކީ ގާތް ބައެއް ކަމަށެވެ.
