އދ.މަހިބަދޫގައި ވާހަކަ ދައްކަވަމުން މިރޭ މުއިއްޒު ވިދާޅުވީ ޕެންޝަން ފަނޑުގައި މިހާރު 20 ބިލިއަން ރުފިޔާ އެބަހުރި ކަމަށެވެ. އަހަރަކު 100 މިލިއަން ރުފިޔާ ފައިދާގެ ގޮތުގައި އެ ފަނޑަށް ލިބެމުންދާ އިރު ޕެންޝަނުގެ އިތުރުން އެ ފައިސާ ބޭނުން ކުރެވެނީ ހައްޖަށް ދިއުމަށާއި ހައުސިން ގަތުމަށް އެކަނި ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ވެރިކަން ލިބިވަޑައިގެންފި ނަމަ ޕެންޝަނާ ބެހޭ ގާނޫނަށް ބަދަލު ގެނެސް މިހާރަށް ވުރެ ބޮޑަށް އެ ފަނޑަށް ޖަމާ ކުރެވޭ ފައިސާގެ ބޭނުން ހިފޭނެ އިންތިޒާމުތައް ހަމަޖައްސާނެ ކަމަށެވެ. އެގޮތުން 10 އަހަރު ވަންދެން އެ ފަނޑަށް ފައިސާ ޖަމާ ކުރުމުން އެ ފައިސާއިން ގެދޮރު ބިނާ ކުރުމާއި، ދަރިން ރާއްޖެއިން ބޭރުން މަތީ ތައުލީމު ހޯދަން ހަރަދު ކުރުމާއި، ވިޔަފާރި ފަށަން އިންވެސްޓު ކުރެވޭ ގޮތަށް ގާނޫނަށް ބަދަލު ގެންނަން ހުށަހަޅާނެ ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ގާނޫނު މިހާރު އޮތް ގޮތުން 30 ނުވަތަ 40 އަހަރު ފައިސާ ޖަމާ ކުރުމުން ވެސް ޕެންޝަނުގެ ގޮތުގައި ރަނގަޅު އެއްޗެއް ނުލިބޭ ކަމަށެވެ. އެހެންކަމުން އެ ފަނޑު ބޮޑުކޮށް، އިތުރު އިންވެސްޓުމެންޓުތަކަށް ފުރުސަތު ދޭން ޖެހޭ ކަމަށް މުއިއްޒު ވިދާޅުވިއެވެ.
މަހިބަދޫގައި އިތުރަށް ވާހަކަ ދައްކަވަމުން މުއިއްޒު ވިދާޅުވީ ތަރައްގީ ކުރުމަކީ ފަސޭހަ ވާހަކައެއް ކަމަށެވެ. މިނިވަންކަމުގެ ވާހަކައަކީ އުނދަގޫ ވާހަކައެއް ކަމަށާއި ރާއްޖޭގައި އެކަމަށް ހުރި ހުރަސްތަކަކީ ކޮބައިކަން އެންމެންނަށް ވެސް އެނގޭ ކަމަށެވެ. އިންތިހާބުގެ ދެވަނަ ބުރަކީ ދިވެހިންނަށް އޮތް ބޮޑު ފުރުސަތެއް ކަމަށާއި، ގައުމީ ވިސްނުމުގައި އެންމެން ނުކުންނަން ޖެހޭ ކަމަށް މުއިއްޒު ވިދާޅުވިއެވެ.
