ރިޔާސީ އިންތިހާބުގެ ދެވަނަ ބުރުގެ ކެމްޕޭނަށް އދ.މަހިބަދޫއަށް ވަޑައިގެން ބޭއްވި ކެމްޕޭން ޖަލްސާގައި ވާހަކަ ދައްކަވަމުން ޑރ.މުއިއްޒު ވިދާޅުވީ ނޫސްވެރިކަމުގެ ދާއިރާ އަޅުވެތި ކޮށްފައިވާ ކަމަށެވެ. ސަރުކާރުގެ ކޮންމެވެސް ކުންފުންޏަކުން ނުވަތަ ރައީސުލްޖުމްހޫރިއްޔާގެ އޮފީހުން ބައެއްފަހަރު ފައިސާ ދޭ ވާހަކަ އަޑުއިވޭ ކަމަށާއި، އެގޮތަށް އެކަންވީމަ، ސަރުކާރުގެ ނުފޫޒު ނޫސްވެރިކަމަށް ފޯރާ ކަމަށާއި، އެއީ ނޫސްވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ލިބޭ ނިކަމެތިކަމެއް ކަމަށްވެސް ޑރ.މުއިއްޒު ވިދާޅުވިއެވެ.
ނޫސްވެރިކަމުގެ ދާއިރާއަށް އަލަށް ވަންނަން ބޭނުންވާ ފަރާތްތަކަށް ފަސޭހަކަމާއެކު ތައުލީމު ހޯދުމުގެ ފުރުސަތެއް ނެތް ކަމަށް ވެސް ޑރ.މުއިއްޒު ވިދާޅުވިއެވެ.
ޒަމާނީ ޑިމޮޮކްރެސީއެއް މި ގައުމުގައި ގާއިމުކޮށް ހިތްހަމަޖެހުމާއި ޔަގީންކަން ސަރުކާރުގެ ނިޒާމްގެ ތެރެއިން ހޯދައިދިނުމަށް މީޑިއާއަށް މިނިވަންކަން ލިބެންޖެހޭ ކަމަށް މުއިއްޒު ވިދާޅުވިއެވެ. އަދި އެދާއިރާ ތަރައްގީވުމުގެ ފުރުސަތު ދޭންޖެހޭކަމަށް ވެސް މުއިއްޒު ވިދާޅުވިއެވެ.
ދައުލަތުގެ ބަޖެޓުން މީޑިއާތަކަށް ފައިސާ ދިނުމަކީ ރައީސް އިބްރާހީމު މުހައްމަދު ސޯލިހުގެ މެނިފެސްޓޯގައި ހިމަނައިފައިވާ އެމަނިކުފާނުގެ ރިޔާސީ ވައުދެއްކަން ވެސް ފާހަގަކޮށްލެވެއެވެ. އެމްޑީޕީގެ ހެޔޮވެރިކަމުގެ ސިޔާސާތުގައި ހިމެނޭ ދައުލަތް ހިންގުމާއި ޖަވާބުދާރީ ކުރުވަނިވި ނިޒާމު ހަރުދަނާކުރުމުގެ ތެރޭގައި ހިމެނޭ މީޑިއާގެ މިނިވަންކަން ކަށަވަރުކުރުމުގައިވާ ގޮތުން މީޑިއާތަކުގެ މާލީ ގާބިލުކަމަށް ވަކި ފަރާތަކަށް ބަރޯސާވުން ނައްތާލުމަށްޓަކައި ގާނޫނުގައި ކަނޑައަޅާ ވަކި ޝަރުތުތަކެއް ފުރިހަމަވާ މީޑިއާތަކަށް ދައުލަތުގެ ބަޖެޓުން ކަނޑައެޅޭ އިންސައްތައެއްގެ ފައިސާ އެލޮކޭޓްކުރެވޭނެއެވެ. އަދި މި ފައިސާ ދޫކުރެވެނީ ހަމަހަމަކަމާއި ނުފޫޒުން އެއްކިބާވެފައިވާ ނިޒާމަކުންކަން ކަށަވަރުކުރުމަށް، ބައިނަލްއަގުވާމީ މިންގަނޑުތަކާއި އުސޫލްތަކާއި އެއްގޮތަށް އޮންނަ ރޭޓިންގް ނިޒާމެއްގެ ތެރެއިން ކަމަށް ވެސް އެމްޑީޕީގެ މެނިފެސްޓޯގައި ބުނެފައިވެއެވެ.
