ދެވަނަ ބުރުގެ ކެމްޕެއިނަށް ވަޑައިގެން ނ. ލަންދޫގައި ބޭއްވި ޖަލްސާގައި މުއިއްޒު ވިދާޅުވީ މި ވަގުތު އެންމެ މުހިންމީ ރާއްޖޭގެ މިނިވަންކަން ކަށަވަރުކޮށްދިނުން ކަމަށާއި، ވެރިކަން ލިބިވަޑައިގެންފިނަމަ، ހާއްސަ އިސްކަމެއް ދެއްވައިގެން އެންމެ ފުރަތަމަ ވެސް ކުރައްވާނެ ކަމަކީ އެއީ ކަމަށް ޑރ. މުއިއްޒު ވިދާޅުވިއެވެ.
ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ، އިންޑިއާ ސިފައިން ރާއްޖޭގައި ތިބިކަން މިހާރު އޮޅުވާނުލެވޭނެ ކަމަށާއި އެކަން ދިވެހި ގިނަ ރައްޔިތުން ގަބޫލު ކުރާ ކަމަށެވެ. އަދި ރައީސް އިބްރާހިމް މުހައްމަދު ސޯލިހް ވެސް މިލިޓަރީ މަސައްކަތެއް ކުރުމަށް ރާއްޖޭގައި ބޭރުގެ ސިފައިން ނުތިބޭނެ ކަމަށް ވިދާޅުވެ، އެ ކަމަށް ރިޔާސީ ބަހުސްގައި ވެސް އެބަސްވެވަޑައިގެންފައިވާ ކަމަށް މުއިއްޒު ވިދާޅުވި އެވެ.
ބޭރުގެ ސިފައިން ތިބީ މިލިޓަރީ ބޭނުމަކު ނޫން ކަމަށް ރައީސް ވިދާޅުވުމުން، އެ މީހުން މިތަނުގައި ތިބުމުގެ ބޭނުމެއް ނެތް ކަމަށް ޑރ. މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި، ޕީއެންސީގެ ވެރިކަމެއްގައި ރާއްޖޭގެ މިނިވަންކަން ޔަގީން ކުރާނީ ޑިޕްލޮމަސީގެ ރީތި އުސޫލުތަކުގެ ތެރެއިން ކަމަށާއި އެކަން ކުރެވޭނެ ކަމުގެ ޔަގީންކަން ވެސް އެބައޮތްކަމަށް ވިދާޅުވިއެވެ. އެކަމަކު، އެކަމުގައި ރައްޔިތުންގެ ވަރަށް ބޮޑު އެހީތެރިކަމެއް ބޭނުންވާ ކަމަށް ވިދާޅުވެ، މި މަހު 30 ގައި އޮންނަ އިންތިހާބުގައި ބޮޑު ޕަސެންޓޭޖަކުން އިންތިހާބު ކާމިޔާބުކޮށްދެއްވުމަށް ވިހާވެސް ގިނަ އަދަދެއްގެ ބޭފުޅުން ވޯޓް ދެއްވުމަށް އެދިވަޑައިގެންނެވިއެވެ.
