ސޯސަން ޖަގަހާގައި މިރޭ ބޭއްވި އެއްވުމުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އެމަނިކުފާނާ ދެކޮޅަށް އިދިކޮޅު ފަރާތްތަކުން އެންމެ ބޮޑަށް ދައްކާ ވާހަކައަކީ ރާއްޖޭގެ މިނިވަންކަމާއި އިސްތިގުލާލު ނޯންނާނެ ކަމަށް ބުނެ ދައްކާ ދޮގު ވާހަކަތައް ކަމަށެވެ.
ރައީސް ސޯލިހު ވިދާޅުވީ މިނިވަންކަމާއި އިސްތިގުލާލު ނަގާލަން އުޅޭ ކަމަށް އެމަނިކުފާނަށް ތުހުމަތު ކުރާއިރު، ބޭރު މީހުންނަށް ބިން މިލުކު ކުރެވޭ ގޮތަށް ބަދަލު ގެނައީ ކޮން ބައެއްކަން ނޯޅޭނެ ކަމަށެވެ. ދަންވަރު މަޖިލިސް ހުޅުވައިގެން އޭރު އެމަސައްކަތް ކުރި އިރު ވެސް އެކަމާ ދެކޮޅަށް ނުކުންނެވި ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ ބޭރުގެ ސިފައިން ރާއްޖޭގައި ތިބި ކަމަށް ދައްކާ ވާހަކަތަކަކީ ވެސް ދޮގެއް ކަމަށާއި، ސިފައިން ތިބި ކަމަށް ބުނާ ތަންތަން ވެސް ދައްކަން ތައްޔާރަށް ހުންނެވި ކަމަށެވެ.
ރައީސް ސޯލިހު ވިދާޅުވީ ރާއްޖޭގެ ހާރިޖީ ސިޔާސަތަކީ ގައުމުގެ މަސްލަހަތު އިސްކުރުން ކަމަށެވެ. ދިވެހިންގެ ކަންކަން ނިންމަނީ ދިވެހިން ކަމަށާއި، ހާރިޖީ ސިޔާސަތަށް ބަސް ކިޔޭނެ އެހެން ބަޔަކު ނުތިބޭނެ ކަމަށް ވެސް ރައީސް ސޯލިހު ވިދާލުވިއެވެ. ޕީޕީއެމްގެ ސަރުކާރުން ގުޅުން ކެނޑި އިސްލާމީ ގައުމުތަކާއި ގުޅުން ބަދަހި ކުރެވިއްޖެ ކަމަށާއި، ދިވެހިންނަކީ ބައިނަލު އަގުވާމީ މައިދާނުގައި ބަސްވިކޭ ބައެއް ކަމަށް ރައީސް ސޯލިހު ވިދާޅުވިއެވެ.
