އުމުރުން 22 އަހަރުގެ އުމަރު ނިޔާވީ މި މަހުގެ 10 ވަނަ ދުވަހު އުސް އިމާރާތެއްގެ 14 ވަނަ ފަންގިފިލާއިން ބިން މައްޗަށް ވެއްޓުމާ ގުޅިގެންނެވެ.
މެލޭޝިއާގެ ފުލުހުންނާ ކަމާ ގުޅޭ އިދާރާތަކުގެ ތަހުގީގަށް ފަހު އުމަރުގެ ހަށިގަނޑު އާއިލާ އާ ހަވާލުކޮށްފައިވަނީ އިއްޔެ ހަވީރެވެ. އޭނާގެ ހަށިގަނޑު މާލެ ގެނެސްފައިވަނީ މިއަދު ހެނދުނެވެ. އުމަރުގެ ހަށިގަނޑު މިރޭގެ ވަގުތެއްގައި ހިތަދޫއަށް ގެންގޮސް ވަޅުލުމަށް ވަނީ ނިންމާފައެވެ.
މައުލޫމާތު ލިބޭގޮތުން އުމަރުގެ ހަށިގަނޑު ރާއްޖެ ގެނައުން ލަސްވީ މެލޭޝިއާގެ ގާނޫނީ ނިޒާމު އޮންނަ ގޮތުން އެ ގައުމުގައި މުސްލިމަކު ނިޔާވެއްޖެނަމަ ހަށިގަނޑު ގައުމުން ބޭރަށް ގެންދެވެނީ ހިނަވައި، ކަފުންކޮށް އަދި ކަށު ނަމާދު ކުރުމަށްފަހުގައި ކަމަށްވުމާ އެކު އެ ހުރިހާ ކަމެއް ކުރަން ޖެހުމުންނެވެ.
އުމަރުގެ ކަށުނަމާދު އޮތީ އިއްޔެ އަސުރު ނަމާދަށްފަހު ޕުޗުންގެ މަސްޖިދު ޖުމެކް ބަޓް 12 ގައެވެ. އުމަރުގެ ކަށުނަމާދުގައި މެލޭޝިއާގައި ހުންނަ ރާއްޖޭގެ އެމްބަސީގެ މުވައްޒަފުންގެ އިތުރުން މެލޭޝިއާގައި ކިޔަވަމުން އަންނަ ބައެއް ދަރިވަރުން ވަނީ ބައިވެރިވެފައިވެއެވެ.
