ނަރީޝް މި ޔަގީންކަން ދެއްވީ، މާލޭ ސިޓީ ކައުންސިލުގެ މުވައްޒަފުންނާއެކު، މޭޔަރުގެ ހަސިއްޔަތުން އިންތިހާބީ ރައީސް، ޑރ. މުއިއްޒު ބައްދަލުކުރައްވާ ފަހު ބައްދަލުވުމަށް މިހާރު ދަރުބާރު ގޭގައި ބާއްވަމުންދާ ޖަލްސާގަ އެވެ.
ވަގުތީ ގޮތުން މާލޭ ސިޓީ ކައުންސިލުގެ މޭޔަރުކަން ވެސް ފުރުއްވަމުން ގެންދަވާ ނަރީޝް ވިދާޅުވީ، މުއިއްޒުގެ ވެރިކަމުގައި ހޭދަކުރައްވާ ފަސް އަހަރުގެ މުއްދަތުގައި އެމަނިކުފާނުގެ އިރުޝާދާ އެކީ، މާލޭ ސިޓީގެ މޭޔަރު ކަމަށް ވަޑައިގަންނަވާ ބޭފުޅަކާ އެކީގައި މާލެ ސިޓީގެ ތަރައްގީ އަށް ކުރަންޖެހޭ ހުރިހާ ކަމެއްގައި އެއްބާރުލުން ދޭނެ ކަމަށެވެ. އަދި އެމަނިކުފާނާ އެކީގައި މަޑުކުރާނެ އެކަކަށްވެސް އޭނާ ވާނެ ކަމުގެ ޔަގީންކަން ވެސް އެރުއްވި އެވެ.
ނަރީޝް ވިދާޅުވީ، މާލޭ ސިޓީ ކައުންސިލުގެ ސްޓްރެޓެޖިކް އެކްޝަން ޕްލޭންގައިވާ ކަންކަމުގެ ތެރެއިން 90 އިންސައްތަ މުއިއްޒުގެ މޭޔަރު ކަމުގެ ދަށުން ހާސިލުކުރެވިފައިވާ ކަމަށާއި، ހާސިލު ނުވި ކަމެއްގެ ގޮތުގައި އޮތީ، ސަރުކާރުން އެއްބާރުލުން ނުދިނުމުގެ ސަބަބުން ހާސިލު ނުވި ކަންކަން އެކަނި ކަމަށެވެ.
މާލޭ ސިޓީ ކައުންސިލް ހިންގުމަށް މިދިޔަ ދެ އަހަރު ކުރިމަތިވި ގޮންޖެހުންތައް، މުއިއްޒު ވެރިކަމާ ހަވާލުވެވަޑައިގަންނަވާ ހިސާބުން ނެތިގެން ދާނެ ކަމަށް އުންމީދުކުރައްވާ ކަމަށް ނަރީޝް ވިދާޅުވި އެވެ.
އަދި، މިއަދު މާލޭ ސިޓީ ކައުންސިލް އާ ވަކިވެގެން ދިޔަޔަސް، މުއިއްޒު ވެރިކަމުގެ ޒައާމަތުގައި ހުންނަ ކޮންމެ ދުވަހަކީ، މާލޭ ސީޓީ ކަައުންސިލާއި، ކައުންސިލުގެ މުވައްޒަފުންނަށް ލިބޭ ވަރަށް ބޮޑު ހިތްހަމަ ޖެހުމަކަށް ވެގެންދާނެ ކަމަށް އުންމީދުކުރައްވާ ކަމަށް ވެސް އޭނާ ވިދާޅުވި އެވެ.
