ބައެއް ރަށްރަށުގައި ހިންގަމުންދާ މަޝްރޫއުތައް ހުއްޓާލައި ކުންފުނިތަކުން މެޝިނަރީތައް އެ ރަށްރަށުން ބާލަމުން އަންނަ ކަމުގެ ޝަކުވާ ލިބެމުންދާ ކަމަށް އިންތިހާބީ ރައީސް ޑރ. މުހައްމަދު މުއިއްޒުގެ އޮފީހުން މީގެ ކުރިން ބުނެފައިވެއެވެ. އެ ކަމާ ގުޅިގެން މުއިއްޒު ވިދާޅުވީ އެއްވެސް ރަށެއްގައި ހިނގާ އެއްވެސް މަޝްރޫއެއް ހުއްޓާލަން، ނޫނީ މަޑުޖައްސާލަން އެމަނިކުފާނު ނުދަންނަވާ ކަމަށާއި އެމަނިކުފާނުގެ ފަރާތްޕުޅުން އެއްވެސް ބޭފުޅަކު އެކަހަލަ އެންގުމެއް ނާންގާނެ ކަމަށެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވެފައިވަނީ ސަޕްލައި ނުކުރެވި ލަސްތަކެއް ދިމާވެގެން އެ ކުންފުނިން ކުރިއަށްދާ ބައެއް މަސައްކަތްތައް މަޑުޖެހިފައި ހުރެދާނެ ކަމަށެވެ. އެހެންނަމަވެސް، އެ ކުންފުނިން ހިންގަމުންދާ އެއްވެސް މަޝްރޫއެއް ހުއްޓާލާފައި ނުވާނެ ކަމަށް އާޒިމް ވިދާޅުވެފައިވެއެވެ. އާޒިމް ވިދާޅުވެފައިވާ ގޮތުގައި އެއްވެސް ފަރާތަކުން އެއްވެސް މަޝްރޫއެއް ހުއްޓާލުމަށް އެ ކުންފުންޏަށް އަންގާފައި ނުވާ ކަމުގައެވެ.
އާރުޑީސީން ކުރިއަށް ގެންދާ މަޝްރޫއެއްގެ ތެރެއިން: މަޝްރޫތައް ނުހުއްޓި ކުރިއަށްދާ ކަމަށް ވަނީ ބުނެފައި - ފޮޓޯ:އާރުޑީސީ
އާރުޑީސީން ބުނެފައިވަނީ އެ ކޯޕަރޭޝަނުން ރަށްރަށުގައި ކުރިއަށްގެންދާ މަޝްރޫއުތަކުގެ ތެރެއިން މާމިގިލީގައި ހިންގަމުންދާ މަޝްރޫއު ފިޔަވައި އެހެން ހުރިހާ މަޝްރޫއެއްގެ މަސައްކަތްތައް ކުރިއަށްދާ ކަމަށެވެ. މާމިގިލީގައި އެ ކުންފުނިން ކުރަމުން އަންނަ މަސައްކަތް ހުއްޓިފައި ވަނީ ރަށު ކައުންސިލުން ސްކޯޕަށް ބަދަލު ގެންނާތީ ކަމަށް އެ ކުންފުނިން ބުނެފައިވެއެވެ. އާރުޑީސީން ބުނެފައިވާ ގޮތުގައި މިއީ އިންތިގާލީ މަރުހަލާކަމުން އާ މަޝްރޫއެއް އެ ކުންފުނިން ނުފަށާނެ ކަމުގައެވެ. އެހެންނަމަވެސް، ކުރިން ފަށާފައި ހުރި ހުރިހާ މަޝްރޫއުތަކެއްގެ މަސައްކަތްތައް ކުރިއަށްދާ ކަމަށް އާރުޑީސީން ބުނެއެވެ.
