އިންތިހާބީ ރައީސްގެ އޮފީހުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފިރުޒުލް ވިދާޅުވީ ސަޕްލިމެންޓަރީ ބަޖެޓަކީ ސަރުކާރުން ހުށަހަޅާ ބަޖެޓެއް ކަމަށާއި ހިނގަމުންދާ ސަރުކާރުން މި އަހަރަށް ފާސްކުރި ބަޖެޓުގެ ތެރެއިން ކަންކަން ހަމަނުޖެހިދާތީ އެ ކަންކަން ފޫބެއްދުމަށް ނިންމި ނިންމުމެއްގެ ތެރެއިން ފޮނުވި ބަޖެޓެއް ކަމަށެވެ.

މަޖިލީހަށް ފޮނުވި ސަޕްލިމެންޓަރީ ބަޖެޓަކީ އިންތިހާބީ ރައީސްގެ އެދުމަކަށް ނުވަތަ އެފަދަ މަޝްވަރާއެއްގެ ތެރެއިން ހުށަހެޅި ބަޖެޓެއް ނޫން ކަމަށް ފިރުޒުލް ވިދާޅުވިއެވެ. ފިރުޒުލް ވިދާޅުވެފައިވަނީ ބަޖެޓުގެ ތެރެއިން ލިބުނު ކުޑަކުޑަ "ވިންޑޯ" އެއްގެ ތެރެއިން ބައެއް ކަންކަން ހިމެނުމުގެ ފުރުސަތު ލިބުނު ކަމަށާއި ބަޖެޓު ހުށަހެޅިގެން ދަނީ އެ ކަންކަމާ އެކުގައި ކަމަށެވެ.

ބަޖެޓު އެކުލަވާލުމުގެ މަސައްކަތުގެ ތެރެއިން ލިބުނު ކުޑަ "ވިިންޑޯ" ގެ ތެރެއިން އަމާޒަކަށް ހެދީ އަލަށް ފެށިގެންދާ ސަރުކާރުގެ 100 ދުވަހުގެ ވައުދުތަކުގެ ތެރޭގައި ހިމެނޭ ބޭނުންވާ މަސައްކަތްތައް ފަށައިގަތުމުގެ ބިންގާ އެޅިގެން އެ ކަންކަމަށް މަގުފަހިކުރުން ކަމަށް ފިރުޒުލް ވިދާޅުވިއެވެ.