2021 ވަނަ އަހަރު ބޭއްވި މާލޭ ސިޓީ ކައުންސިލް އިންތިހާބު ކާމިޔާބު ކުރެއްވި، ނަރީޝް މިއަދު ކުރެއްވި ޓްވީޓެއްގައި ވިދާޅުވީ ކުރިއަށް އޮތް ރައްޔިތުން މަޖިލިސް އިންތިހާބުގައި ކުޅުދުއްފުށީ އުތުރު ދާއިރާގެ ޕީޕީއެމް/ޕީއެންސީ ޕްރައިމަރީގައި ވާދަކުރައްވަން އޭނާ ނިންމަވާފައިވާ ކަމަށެވެ. އެގޮތަށް ނިންމެވީ އެ ދާއިރާގެ ގިނަ ރައްޔިތުންގެ އެދުުމުގެ މަތިން ކަމަށް ވެސް ނަރީޝް ވިދާޅުވި އެވެ.
ސިފައިންގެ ތެރޭގައި ކުރިން މަސައްކަތްކުރެއްވި ނަރީޝް އިތުރަށް ވިދާޅުވި ގޮތުގައި، އޭނާގެ އެދުމަކީ ކުޅުދުއްފުށީ އުތުރު ދާއިރާގެ ޕީޕީއެމް/ޕީއެންސީގެ މެންބަރުން އޭނާ އަށް ތާއިދުކޮށް، ޕްރައިމަރީ ކާމިޔާބި ކޮށްދިނުމެވެ.
މި ވަގުތު ނަރީޝް ހުންނެވީ ވަގުތީ ގޮތުން މާލޭގެ މޭޔަރުކަމުގެ ޒިންމާތަކާ ހަވާލުވެގެންނެވެ.
މާލޭގެ މޭޔަރު ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބު ކުރެއްވުމާ އެކު، އިންތިގާލީ މަރުހަލާގެ ކަންކަމަށް ވަގުތު ހުސްކުރެއްވުމަށް އެ މަނިކުފާނު ވަނީ މޭޔަރުގެ ޒިންމާތަކުން އެއްފަރާތްވެފައެވެ. އެހެންވެ، އެ ޒިންމާތައް ވަގުތީ ގޮތުން އަދާ ކުރައްވަނީ ޑެޕިއުޓީ މޭޔަރު ނަރީޝް އެވެ.
