16 އަހަރުން ދަށުގެ އުމުރުފުރާގައި ކުނބުރުދޫ ސްކޫލްގެ ފިރިހެން ޓީމު ވާދަކުރީ ކަލާފާނު ސްކޫލާއެވެ. މި މެޗު ކުނބުރުދޫ ސްކޫލުން ކާމިޔާބުކުރީ ސީދާ ދެސެޓުންނެވެ. ދެސެޓުވެސް ކާމިޔާބުކުރީ 25-14 އިންނެވެ. މި އުމުރުފުރާގެ އަންހެން ޑިވިޝަނުގައި ކ.އަތޮޅު މަދަރުސާ އާއި ވާދަކޮށް ކުނބުރުދޫ ސްކޫލުން ކުރިހޯދީ ސީދާ ދެސެޓުންނެވެ. ސެޓުތައް ކާމިޔާބުކުރީ 25-17 އަދި 25-15 އިންނެވެ. 

ފ. އަތޮޅު މަދަރުސާއިން 16 އަހަރުން ދަށުގެ އުމުރުފުރާގައި މަޖީދިއްޔާ ސްކޫލުގެ މައްޗަށް ސީދާ ދެސެޓުން ކުރިހޯދިއިރު، ސެޓުތައް ކާމިޔާބުކުރީ 25-7 އަދި 25-14 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ފ.އަތޮޅު މަދަރުސާގެ އަޒާން ފަތުހުﷲއެވެ. މި އުމުރުފުރާގެ އަންހެން ޑިވިޝަނުގައި އިމާދުއްދީން ސްކޫލާއި ވާދަކޮށް ފ.އަތޮޅު މަދަރުސާއިން މެޗު ކާމިޔާބުކުރީ 25-13 އަދި 25-14 އިންނެވެ. 

އިމާދުއްދީން ސްކޫލާއި ފ.އަތޮޅު މަދަރުސާ ބައްދަލުކުރި މެޗުގެ ތެރެއިން، ފޮޓޯ: ޑިޖިޓަލް ސްޓޫޑިއޯ

މީގެ އިތުރުން، ފ. އަތޮޅު މަދަރުސާއިން ވަނީ 14 އަހަރުން ދަށުގެ ފިރިހެން ޑިވިޝަނުގައި ކެޔޮދޫ ސްކޫލުގެ މައްޗަށް ސީދާ ދެސެޓުން ކުރި ހޯދާފައެވެ. ސެޓުތައް ކާމިޔާބުކުރީ 25-12 އަދި 25-13 އިންނެވެ. 

މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، 16 އަހަރުން ދަށުގެ އުމުރުފުރާގެ ފިރިހެން ޑިވިޝަނުގައި ދަނގެތީ ސްކޫލުން އިމާދުއްދީން ސްކޫލްގެ މައްޗަށް ކުރިހޯދީ 25-20 އަދި 25-22 އިންނެވެ. ހަމައެހެންމެ، މި އުމުރުފުރާގައި ތާޖުއްދީން ސްކޫލާއި ވާދަކޮށް ވ.އަތޮޅު ތައުލީމީ މަރުކަޒުން ވަނީ 25-22 އަދި 25-20 އިން މެޗު ކާމިޔާބު ކޮށްފައެވެ. 14 އަހަރުން ދަށުގެ އުމުރުފުރާގައި ތާޖުއްދީ ސްކޫލާއި ވާދަކޮށް މަޖީދިއްޔާ ސްކޫލުން ކުރިހޯދީ ދެސެޓު އެއް ސެޓުންނެވެ. ސެޓުތައް ނިމުނީ 25-19، 22-25 އަދި 15-10 އިންނެވެ.