ރާއްޖެ ޓީވީގެ ޕްރޮގްރާމެއްގައި ރޭ ވާހަކަ ދައްވަމުން ރޮޒައިނާ ވިދާޅުވީ ޑިމޮކްރަސީގެ "ބައްޕަކަމަށް" ވަކާލާތު ކުރައްވާ ބޭފުޅަކު ކުރައްވާނެ އެންމެ ހަޑިހުތުރުކަމަކީ ވޯޓަށް ފިއްލެވުންކަމަށެވެ.
ރޮޒައިނާ ވިދާޅުވީ ޑޮމޮކްރެޓިކް ވެއްޓެއްގައި އެންމެ އަސާސީ އެއްކަމަކީ ވޯޓުލައިގެން ކަންކަން ނިންމުމަކަށެވެ.
ރޮޒައިނާ ވިދާޅުވީ މަޖިލީހުގެ މެންބަރުން އިތުބާރު ނުކުރައްވާ ބޭފުޅަކަށް މަޖިލީހުގަ ނީދެވޭނެކަމަށެވެ. އަދި އިތުބާރު ނެތްކަން ނުވަތަ އޮތްކަން ކަނަޑައަޅަނީވެސް ވޯޓަކުންކަމަށެވެ.
ރައީސް ނަޝީދުގެ އިތުބާރު ނެތްކަމުގެ މައްސަލަ ހުށަހެޅީ އެމްޑީޕީގެ 49 މެންބަރުންގެ ސޮޔާއެކުއެވެ. އެ ގާރާރު އާދިއްތަ ދުވަހު އެޖެންޑާކުރި ނަމަވެސް މަޖިލީހުގެ ނައިބު ރައީސް އީވާ އަބްދުﷲ އާލާސްކަންފުޅާ އުޅުއްވާތީ އެކަމަނާ ސަލާން ފޮނުއްވުމުން މަޖިލީހުގެ ޖަލްސާއެއް ނުބޭއްވުނެވެ.
މިއަދުވެސް އެ މައްސަލަ އެޖެންޑާކުރިއެވެ. ނަމަވެސް އީވާ ސަލާން ފޮނުއްވުމުން މިއަދުވެސް މަޖިލިސް ޖަލްސާއެއް ނުބޭއްވުނެވެ. ދަ ޑިމޮކްރެޓްސް އިން ބުނެފައިވަނީ އީވާ އުޅުއްވަނީ ޑެންގޫ ހުން ޖެހިވަޑައިގެންކަމަށެވެ.
އަންގާރަ ދުވަހަށް އަލުން ރައީސް ނަޝީދުގެ އިތުބާރު ނެތްކަމަށް ބުނެ ހުށަހަޅާފައިވާ ގަރާރު ވަނީ އެޖެންޑާކޮށްފައެވެ.
