ރާއްޖެ ޓީވީއަށް ދެއްވި އިންޓަވިއެއްގަ އަމީރު ވިދާޅުވީ، މުސްތަގުބަލުގައި ކަން ހިނގާނެގޮތެއް އެނގި ނުލައްވާކަމަށެވެ.
"ޤާނޫނާއި ޤަވާއިދުތަކާއި ހިލާފަށް ކޮށްފައި އޮތް އެއްވެސް ކަމެއް ނޯންނާނެ. އެއީ ހަމައެކަނި މިއަދުގެ ވާހަކަ ނޫން. މި 5 އަހަރުވެސް އެފަދަ ކަމެއް ނުކުރަން،" -އަމީރު-
ފިނޭންސް މިނިސްޓަރު މިހެން ވިދާޅުވީ، ބަޖެޓު ހުށަހެޅުއްވުމަށް އޭނާ މިއަދު މަޖިލީހަށް ހާޒިރު ވެފައިނުވާތީ ގާނޫނު އަސާސީއާ ހިލާފުވެ ވަޑައިގެންނެވިކަމަށް ރައްޔިތުންގެ މަޖިލީހުގެ މައިނޯރިޓީ ލީޑަރު އަލީ އާޒިމް ވިދާޅުވެފައިވާތީއެވެ.
ފިނޭންސް މިނިސްޓަރު މިއަދު މަޖިލީހަށް ވަޑައިނުގަތީ މަޖިލީހުގެ ރައީސްކަމުން މުހައްމަދު ނަޝީދު ވަކިކުރުމަށް އެމްޑީޕީން ހުށަހަޅާފައިވާ ގަރާރު ކުރިއަށް ނުގެންގޮސް، އިތުރު މަސައްކަތެއް ކުރިއަށް ނުގެންދެވޭނެކަމަށް މަޖިލީހުގެ ގަވާއިދުގައި ބަޔާންކޮށްފައިވާކަމަށް ވިދާޅުވެ ބަންޑާރަނައިބު އިބްރާހިމް ރިއްފަތު ފިނޭންސް މިނިސްޓަރަށް ލަފާދެއްވާފައިވާތީއެވެ.
މި މައްސަލައާ ގުޅޭގޮތުން ދެއްވި ނޫސްވެރިންގެ ބައްދަލުވުމެއްގަ އާޒިމް ވިދާޅުވީ ގާނޫނުއަސާސީއާ ހިލާފަށް އެއްވެސް ކަމެއް ކުރުމަށް، އެއްވެސް ފަރާތަކަށް ބަންޑާރަ ނައިބަކަށް ލަފާ ނުދެއްވޭނެ ކަމަށެވެ.
އާޒިމް ވިދާޅުވީ މަޖިލީހުގެ ތަޅުމަށް ރައީސް ނަޝީދުގެ އިތުބާރުނެތްކަމުގެ މައްސަލަހުށަނޭޅެނީސް، އެއީ ހުށަހެޅުނު މައްސަލައެއްކަމަށް ނުބެލޭނެކަމަށެވެ. އެހެންކަމުން މަޖިލީހަށް ބަޖެޓު ހުށަހެޅުމަށް އެއްވެސް ހުރަހެއް ނެތްކަަމަށް ވެސް އޭނާ ވިދާޅުވިއެވެ.
މަޖިލީހަށް ރައީސް ނަޝީދުގެ އިތުބާރުގެ ނެތްކަމުގެ މައްސަލަ އެމްޑީޕީން ވައްދާފައިވަނީ 49 މެންބަރުންގެ ސޮޔާއެކުއެވެ.
