އަންނަ ޖެނުއަރީ މަހު ބޭއްވުމަށް ހަމަޖެހިފައިވާ މާލޭ ސިޓީގެ މޭޔަރުކަމުގެ މަގާމަށް، ޕީޕީއެމް/ޕީއެންސީގެ ޓިކެޓުގައި ކުރިމަތިލުމަށް ނިންމެވިކަން ހާމަކުރައްވާ އާޒިމާ މިއަދު ނެރުއްވި ނޫސް ބަޔާނުގައި ވިދާޅުވީ މޭޔަރުކަމުގެ މަގާމަށް ކުރިމަތިލެއްވުމަށް، ގަސްދުކުރެއްވީ އުމުރުން 17 އަހަރުން ފެށިގެން ގައުމީ ހިދުމަތުގައި ދެމިހުރި ފަރާތަކަށްވެފައި، ރައްޔިތުންނާ ގާތުން ހިދުމަތްކުރުމުގެ ޝައުގު ހުރުމުގެ އިތުރުން މާލޭ ސަރަހައްދު ހަގީގީ މާނައިގައި ތަރައްގީކުރުމަށްޓަކައި އަދިވެސް ބޮޑެތި މަސައްކަތްތަކެއް ކުރަން ޖެހިފައިވާ ކަމަށް ގަބޫލުކުރެވި، އެ ކަންކަން ދިވެހި ރައްޔިތުންނަށް ކޮށްދިނުމުގައި އިސްނެގުމަށް ބޭނުންވާތީ ކަމަށެވެ.
އާޒިމާ ވިދާޅުވެފައިވަނީ 2008 ވަނަ އަހަރުގެ ގާނޫނުއަސާސީން ގެނުވައިދިން އެންމެ ބޮޑު އެއް ބަދަލަކީ ރާއްޖޭގެ އަތޮޅުތަކާއި ރަށްރަށުގެ ހިންގުމުގެ އޮނިގަނޑަށް ގެނެވުނު ބަދަލު ކަމަށެވެ. ޒަމާނުއްސުރެ ވެރިކަމުގެ ފަރާތުން އައްޔަނުކުރައްވަމުން ގެންދެވި ކަތީބުންނާއި އަތޮޅުވެރިންނާއި އަވަށުވެރިންގެ ދައުރު ނިމުމަކަށް ގެނެސް، ރައްޔިތުންގެ ސީދާ އިންތިހާބުން އިހުތިޔާރުކުރާ ބަޔަކަށް މާލެ އާއި އަތޮޅުތައް އަދި ރަށްރަށުގެ ހިންގުން ހަވާލުކުރުން ކަމަށް އާޒިމާ ވިދާޅުވި އެވެ.
އާޒިމާ ވިދާޅުވި ގޮތުގައި ގާނޫނުއަސާސީން ހިންގުމުގެ އޮނިގަނޑަށް ގާނޫނީ ބަދަލެއް ގެނެވުނު ނަމަވެސް ހިންގުމުގެ އޮނިގަނޑުގެ މުހިންމު ކަމަށާއި ރައްޔިތުންގެ ބޭނުންތަކަށް ބަދަލެއް ނާންނަ ކަމުގަ އެވެ. ހާއްސަ ގޮތެއްގައި މާލޭގެ ސަރަހައްދަށް އަންނަމުންދާ ބަދަލުތަކާ އެކު ހިންގުމުގެ އޮނިގަނޑު އިތުރަށް ވަރުގަދަކޮށް، ހިންގުން ހަރުދަނާ ކުރުމުގެ ބޭނުންތެރިކަން ދަނީ ދުވަހުން ދުވަހަށް އިތުރުވަމުން ކަމަށް އެކަމަނާ ވިދާޅުވި އެވެ. އާޒިމާ ވިދާޅުވީ ކައުންސިލް އަދި މޭޔަރުގެ އޮފީހާއި ސަރުކާރާ ދެމެދު ހިނގަމުންދިޔަ ދެބަސްވުމާއި ޖެއްސުންކުރުމުގެ ވިސްނުންތަކުގެ ތެރެއިން މާލޭގެ ސަރަހައްދުގެ ތަރައްގީ އާއި ރައްޔިތުންނަށް ލިބެން ޖެހޭ ހިދުމަތްތައް ވަނީ ގާތްގަނޑަކަށް ހުއްޓުމަކަށް އައިސްފައި ކަމަށެވެ. މީގެ ތެރޭގައި ބޯހިޔާވަހިކަމުގެ މައްސަލަތަކާއި ރައްޔިތުންނާއި މުދަލާއި ގެދޮރުގެ ރައްކާތެރިކަމާއި ފުނިޖެހެމުންދާ އިޖުތިމާއީ އަދި ސިއްހީ މައްސަލަތަކަކީ މުއައްސަސާތަކުގެ ސިޔާސީ ހަނގުރާމައަކަށްވީ ނަމަވެސް، ރައްޔިތުންގެ ޒަރޫރީ ބޭނުންތަކާއި އާއިލީ ދިރިއުޅުމާ ސީދާ ގުޅިފައިވާ ބޮޑެތި މައްސަލަތަކެއް ކަމަށް އާޒިމާ ވިދާޅުވި އެވެ. އާޒިމާ ވިދާޅުވެފައިވަނީ މިއަދު މާލޭގެ ސަރަހައްދު ނުވަތަ ގްރޭޓާ މާލޭ ސަރަހައްދު އޮތް ހާލަތުން މިކަންކަމުގެ ސީރިއަސްކަން ކޮންމެ މީހަކަށް އިހުސާސްކުރެވޭނެ ކަމަށެވެ.
އާޒިމާ ވިދާޅުވި ގޮތުގައި ރައްޔިތުންނަށް ދޭނެ ޔަގީންކަމަކީ މުރާލިކަމާ އެކު ރެޔާއި ދުވާލު ހިދުމަތުގައި ދެމިހުންނާނެ، ތެދުވެރިކަމާއި އަމާނަތްތެރިކަމާ އެކު މަސައްކަތްކުރާނެ ފަރާތަކަށްވުން ކަމުގަ އެވެ. ކޮންމެ ހާލެއްގައިވެސް ދިވެހި ގައުމުގެ މަސްލަހަތުތައް އިސްކުރާނޭ މީހެއްގެ ގޮތުގައި އަބަދުވެސް ދެމިހުންނާނޭ ކަމުގެ ޔަގީންކަންދޭ ކަމަށް އެކަމަނާ ވިދާޅުވި އެވެ. އާޒިމާ ވިދާޅުވީ ރައްޔިތުންނާ އެކު މަސައްކަތްކުރާނެ ވިއުގައެއް އުފައްދައި، މާލެ ސިޓީއަކީ ރައްޔިތުންގެ ހިޔާލާއި މަޝްވަރާ އާއެކު ތަރައްގީކޮށް، އާއިލާ އާއެކު ދިރިއުޅެވޭނޭ ފަދަ ތަނަކަށް ހަދައިދޭނެ ކަމަށެވެ. ގްރޭޓާ މާލެއަކީ ވިޔަފާރި އާއި ވަޒީފާތަކަށް މަގުފަހިވެފައިވާ އަދި ހުރިހާ ގިންތިއެއްގެ ހުރިހާ އުމުރެއްގެ، ހުރިހާ ހާލަތެއްގައިވާ ރައްޔިތުންނަށްވެސް ރައްކާތެރިކަމާ އެކު ދިރިއުޅެވޭނެ ތަނަކަށް ހަދައިދޭނެ ކަމަށް އާޒިމާ ވިދާޅުވި އެވެ. އާޒިމާ ވިދާޅުވެފައިވަނީ ކޮންމެ ހިޔާލެއްގައި ހުރި ނަމަވެސް އެމީހަކާ އެކު އެކަމަނާއަށް މަސައްކަތް ކުރެވޭނޭ ކަމުގެ ޔަގީންކަންދޭ ކަމަށެވެ.
ގައުމީ ބޮޑެތި މައްސަލަތަކަށް ހައްލު ހޯދޭނީ އެންމެންގެ މަސައްކަތުން ކަމަށާއި އެންމެން އެކައްޗެއް ކިޔައި، އެންމެން އެއް އަމާޒަކަށް މަސައްކަތްކޮށްގެން ކަމަށް އާޒިމާ ވިދާޅުވި އެވެ. އާޒިމާ ވިދާޅުވި ގޮތުގައި މި މަސައްކަތަކީވެސް އެންމެންނަށް އެކުގައި ނޫނީ ކުރެވޭނެ މަސައްކަތެއް ނޫން ކަމުގަ އެވެ. މިކަމަށް ބޭނުން ވަނީ ބައިބައިވުމާއި ވަކިވަކިވުމުގެ ވިސްނުންތައް ދޫކޮށް، މުޖުތަމައުގެ މަސްލަހަތު އިސްކުރުން ކަމަށް އާޒިމާ ވިދާޅުވި އެވެ.
