ނަރީޝް މިރޭ މީސްމީޑިއާގައި ހިއްސާ ކުރެއްވި ޕޯސްޓެއްގައި ވިދާޅުވީ ރައްޔިތުންގެ މަޖިލިހުގެ ތެރެއިން ހިދުމަތެއްކޮށް، ރައްޔިތުންގެ ހައްގުގައި މަޖިލީހުގައި ވަކާލާތުކޮށް، ސަރުކާރާ ގުޅިގެން ދާއިރާއަަށް ތަރައްގީ ހޯދައިދިނުމުގެ މަތިވެރި އަޒުމުގައި އޭނާ ކުޅުދުއްފުށީ އުތުރު ދާއިރާއަށް ވާދަކުރަން ނިންމުމާ ގުޅިގެން އެ ދާއިރާއަށް ނިސްބަތްވާ ގިނަ އަދަދެއްގެ ކަމުވޮށިގެންވާ ބޭފުޅުންނާއި އިސްރަށްވެހިންނާއި ކަނބަލުންނާއި ޒުވާނުންގެ ތާއީދުއޮތްކަން ހާމަކުރަމުން ގެންދިޔަ ކަމަށެވެ.
ކުޅުދުއްފުށީ އުތުރު ދާއިރާއަށް ވާދަކުރަން ނިންމުމާ ގުޅިގެން ޓީމެއްގެ ގޮތުގައި އޭނާއަށް ތާއީދު ހޯދަން މަސައްކަތްކޮށްދިން ހުރިހާ ފަރާތްތަކަށް ނަރީޝް ވަނީ ޝުކުރު އަދާކުރައްވާފަ އެވެ.
ކުރިއަށް އޮތް ރައްޔިތުން މަޖިލިސް އިންތިހާބުގައި ކުޅުދުއްފުށީ އުތުރު ދާއިރާގެ ޕީޕީއެމް/ޕީއެންސީ ޕްރައިމަރީގައި ވާދަކުރައްވަން ނިންމެވިކަން ނަރީޝް އިއުލާނުކުރެއްވީ މިދިޔަ މަހުގެ 23 ވަނަ ދުވަހު އެވެ. ނަރީޝް އޭރު ވިދާޅުވެފައިވަނީ އޭނާ އެ ނިންމުން ނިންމެވީ އެ ދާއިރާގެ ގިނަ ރައްޔިތުންގެ އެދުުމުގެ މަތިން ކަމަށެވެ.
އެންމެފަހުން ބޭއްވި މާލޭ ސިޓީ ކައުންސިލް އިންތިހާބުގައި ޕީޕީއެމްގެ ފަރާތުން ވާދަކުރައްވާ މާފަންނު މެދު ދާއިރާގެ ކައުންސިލަރުގެ މަގާމަށް ހޮވިވަޑައިގަތް ނަރީޝް މިވަގުތު ހުންނެވީ ވަގުތީ ގޮތުން މާލޭގެ މޭޔަރުކަމުގެ ޒިންމާތަކާ ހަވާލުވެވަޑައިގެންނެވެ.
މާލޭގެ މޭޔަރު ކަމުގެ މަގާމުގައި ހުންނެވި ޑރ. މުހައްމަދު މުއިއްޒު މި އަހަރު ބޭއްވި ރިޔާސީ އިންތިހާބު ކާމިޔާބު ކުރެއްވުމާ އެކު، އިންތިގާލީ މަރުހަލާގެ ކަންކަމަށް ވަގުތު ހުސްކުރެއްވުމުގެ ގޮތުން މޭޔަރުގެ ޒިންމާތަކުން ވަނީ އެއްފަރާތްވެވަޑައިގެންފަ އެވެ. އެހެންވެ، އެ ޒިންމާތައް ވަގުތީގޮތުން އަދާކުރައްވަމުން އަންނަނީ ޑެޕިއުޓީ މޭޔަރުގެ ހައިސިއްޔަތުން ނަރީޝެވެ.
