ޕީޕީއެމުން ވަކިވެވަޑައިގެން ރައީސް ޔާމީން އުފައްދަވަން ނިންމެވި ޕާޓީގެ މުއައްސިސަކަށް ޒޭން ހަމަޖެއްސިކަން އިއުލާނުކުރިއިރު، އެ ޕާޓީ އުފެއްދުމުގެ ހުއްދައަށް އެދި މިއަދު ހެނދުނު ވަނީ އިލެކްޝަންސް ކޮމިޝަން (އީސީ) ހުށަހަޅާފަ އެވެ. އާ ސިޔާސީ ޕާޓީގެ ނަމާ އަދި ލޯގޯ ރޭގެ ވަގުތެއްގައި އާންމުކޮށްފައި ވަނީ މީސް މީޑިއާ މެދުވެރިކޮށެވެ.
ޕީއެންއެފް އުފެއްދުމާ ގުޅޭގޮތުން އީސީގެ މެންބަރުންނާ އެކު އެ ޕާޓީ އުފެއްދުމުގައި އިސްކޮށް ހަރަކާތްތެރިވެ ވަޑައިގަންނަވާ ފަރާތްތަކުން ކުރެއްވި މަޝްވަރާތަކަށްފަހު ނޫސްވެރިންނާ ވާހަކަ ދައްކަވަމުން މަލީހު ވިދާޅުވީ އެބޭފުޅުން އީސީއަށް ވަޑައިގަތީ ޕާޓީ އުފެއްދުމަށް ބޭނުންވާ ހުއްދަ ހޯދުމަށް ކަމަށެވެ. އީސީގެ މެންބަރުންނާއި މުވައްޒަފުންނާއި ވަރަށް އެކުވެރި މާހައުލެއްގައި އެކަމާ ގުޅޭގޮތުން މަޝްވަރާ ކޮށްފައިވާކަން ފާހަގަކުރައްވާ މަލީހު ވިދާޅުވެފައި ވަނީ އެ ބޭފުޅުންގެ ފުރިހަމަ އެއްބާރުލުން ވީހާ އަވަހަކަށް، ޕީއެންއެފް އުފެއްދުމަށްޓަކައި ދެއްވާނެ ކަމުގެ ފުރިހަމަ ޔަގީންކަން ލިބިފައިވާ ކަމަށެވެ.
މަލީހު ވިދާޅުވި ގޮތުގައި އާ ޕާޓީ އުފެއްދުމަށް ރައީސް ޔާމީން ބޭނުންފުޅުވެ ވަޑައިގަތީ އެމަނިކުފާނު ހިމެނޭހެން އަށް މީހުންގެ ނަން މަތީގައި ކަމުގަ އެވެ. އެހެންނަމަވެސް އީސީގެ ގަވާއިދު ބުނާގޮތުން ސިޔާސީ ޕާޓީއެއް ރަޖިސްޓްރީ ކުރުމުގެ ހުއްދައަށް އެދެވޭނީ އެންމެ މީހެއްގެ ނަން މަތީގައި ކަމަށް މަލީހު ވިދާޅުވި އެވެ.
ޒޭންގެ އިތުރުން މުއައްސިސުންގެ ގޮތުގައި ދެން ތިއްބަވާނީ ރައީސް ޔާމީނާއި އެމަނިކުފާނުގެ ވެރިކަމުގެ ފުރަތަމަ ނައިބު ރައީސަކަށް ހުންނެވި ޑރ. މުހައްމަދު ޖަމީލު އަހުމަދާއި ކުރީގެ ސީޕީ ހުސައިން ވަހީދާއި މުލިއާގޭގެ ޗީފް އޮފް ސްޓާފް އަހުމަދު މުސްތަފާ އާއި އަދްލީ އިސްމާއީލް އާއި ޑރ. ޖިހާދު ހަސަނުގެ އިތުރުން ކަކާގޭ އަލީ އާދަމް ކަމަށް މަލީހު ވިދާޅުވި އެވެ.
ޕީއެންއެފް އުފެއްދުމުގެ ހުއްދައަށް އެދި އީސީއަށް ހުށަހެޅިއިރު، އެ ޕާޓީގެ ނަމާ އަދި ލޯގޯ ރޭގެ ވަގުތެއްގައި އާންމުކޮށްފައި ވަނީ މީސް މީޑިއާ މެދުވެރިކޮށެވެ.
