އެމަނިކުފާނު މިކަމަށް ގޮވައިލެއްވީ ޔޫއޭއީގައި މިހާރު ކުރިއަށްދާ ކޮޕް 28 ސަމިޓުގައި ތަގްރީރުކުރައްވަމުންނެވެ.
ކޮޕް28 ސަމިޓުގައި މިއަދު ހަވީރު ތަގުރީރުކުރައްވަމުން ރައީސް ވިދާޅުވީ ތިމާވެށީގެ ކަންކަމުގައި ފުރަތަމަ ކަމަކަށް ކުރުން އެންމެ މުހިންމު ކަމަކީ 1.5 ޑިގްރީގައި ދުނިޔޭގެ ފިނިހޫނުމިން ހިފެހެއްޓުމަށް ޓަކައި، ޕެރިސް އެގްރިމަންޓަށް ރިއާޔަތްކޮށް ޕްލޭނެއް އެކުލަވައިލުންކަމަށެވެ.
ރައީސް ވިދާޅުވީ މީގެ 15 ދުވަސްކުރިން ރާއްޖޭގެ ވެރިކަމާ އެ މަނިކުފާނު ހަވާލުވެވަޑައިގެންނެވީ ރާއްޖޭގެ މަސްލަހަތު ހިމެނޭ އެންމެހައި ކަންކަން ހިމާޔަތްކޮށްދެއްވުމުގެ ވައުދުފުޅާއެކު ކަމަށެވެ. އަދި ކޮންމެ ދިވެހި ރައްޔިތަކަށް އުފާވެރި މުސްތަގްބަލެއް ހޯއްދަވައިދެއްވުމުގެ ވައުދުފުޅާއެކު ކަމަށެވެ.
ދުނިޔެ ހޫނުވާ މިންވަރު 1.5 ޑިގްރީގައި ހިފެހެއްޓުމަށް ދުނިޔޭގެ ލީޑަރުންނަށް ރައީސް ޑރ. މުހައްމަދު މުއިއްޒު ގޮވާލެއްވިއިރު، ޕެރިސް އެގްރިމެންޓަކީ ބޭކާރު އެއްޗަކަށް ވެ، އަދި ދުނިޔޭގެ ފިނިހޫނުމިން [މިހާރު ހުރި ވަރަށް ވުރެ] 1.5 ޑިގްރީ އަށް ވުރެ މަތިވިޔަ ނުދީ ހިފަހައްޓައި ނުލެވިއްޖެ ނަމަ މުރަކައިގެ ފަރުތައް މަރުވެ ރާއްޖެ ކަހަލަ ޖަޒީރާ ރަށްތަކުގެ ބަޔޯ ޑައިވާސިޓީ ގެއްލިގެން ދާނެ ކަމަށް ސައެންޓިފިކް ރިޕޯޓް ތައް ބުނެ އެވެ. އަދި މޫސުމާ ބެހޭ ސައެންސަކީ ސިޔާސީ ފުޓުބޯޅައެއް ނޫން ކަމަށް ސައިންސްވެރިން ހެކިވެ އެވެ.
މޫސުމަށް އަންނަ ބަދަލުތަކާ ބެހޭ ގޮތުން ދިރާސާކުރާ ބައިނަލް އަގުވާމީ އެޖެންސީ އައިޕީސީސީ އިން އެންމެ ފަހުން ނެރުނު ރިޕޯޓްގައި ބުނެފައިވާ ގޮތުން ދުނިޔޭގެ ފިނި ހޫނުމިން މިހާރު ހުރި މިންވަރުގައި ދެމެހެއްޓުނަސް ކަނޑުގެ ލޮނުގަނޑު ދާނީ އުފުލެމުންނެވެ. ދުނިޔޭގެ ފިނިހޫނުމިން މިހާރު ހުރީ އެ ރިޕޯޓްގައިވާ ގޮތުން ސިނާއީ އިންގިލާބުގެ ކުރިން ހުރި ވަރަށް ވުރެ 1.5 ޑިގްރީ ސެލްސިއަސް މަތިކޮށެވެ.
ރައީސް ޑރ. މުއިއްޒު އިތުރަށް ވިދާޅުވީ އަޅުގަނޑުމެންގެ ކޮންމެ މުރަކަކޮޅެއް، ކޮންމެ ވެލިފުކެއް، އަދި ކޮންމެ މަހެއް، އަދި ކޮންމެ ރުކެއްގެ އަގެއްވާކަމަށެވެ. އަދި އެއިން ކޮންމެ އެއްޗަކަށް ލިބޭ ކޮންމެ ގެއްލުމަކީވެސް ގައުމަށާއި މުޅި އިގުތިސޯދަށް ލިބޭ ގެއްލުމެއްކަމަށެވެ.
ރައީސް ވަނީ މި އަހަރުގެ ކޮޕް ސަމިޓު ޔޫއޭއީގައި ބާއްވާއިރު އެ ގައުމުން ފޯރުކޮށްދިން ފުރިހަމަ މެހުމާންދާރީއަށް ޝުކުރު އަދައިކުރައްވައިފައެވެ. އަދި ކޮޕް28 ސަމިޓުގެ ރިޔާސަތު ބެލެހެއްޓުމުގައި އެ ގައުމުން އަދާކުރާ ދައުރު ބަލައިގަންނަކަމަށް ވިދާޅުވެފަ އެވެ.
ކޮޕް ސަމިޓަކީ ޖައްވަށް ދޫކުރާ ވިހަ ގޭސްތައް މަދު ކުރުމަށާއި އެޑަޕްޓޭޝަން މަސައްކަތްތައް ފުޅާކުރުމަށާއި ތިމާވެށީގެ ސަބަބުން ލިބޭ ގެއްލުންތައް ކުޑަކުރުމަށްޓަކައި ބޭނުންވާ މާލީ ކަންކަން ފަހިކުރުމަށް މަސައްކަތް ކުރުމަށާއި އެކަމަށް ބާރުއަޅައި މަޝްވަރާ ކުރުމަށް ގައުމުތަކުގެ ލީޑަރުންނާއި އެކި ޖަމިއްޔާތަކާއި ވިޔަފާރިވެރިންނާ އެކު ކޮންމެ އަހަރަކު އެއް ފަހަރު ބާއްވާ ސަމިޓެކެވެ.
މި އަހަރުގެ ސަމިޓުގައި 160 އަށް ވުރެ ގިނަ ގައުމުތަކުގެ ވެރިން ހިމެނޭހެން 70،000 ފަރާތަކުން ބައިވެރިވެވަޑައިގަންނަވަ އެވެ.
ކޮޕް 28 އިއްޔެ އިން ފެށިގެން މިމަހުގެ 12 ވަނަ ދުވަހުގެ ނިޔަލަށް ކުރިއަށްދާނެ އެވެ.
