މުޅި ރާއްޖޭގައި ފަސް މިލިއަން ގަސް އިންދުމުގެ މަޝްރޫއުއެއް ހިންގުމަށް ރައީސް ޑރ. މުހައްމަދު މުއިއްޒު މިއަދު ވައުދު ވެއްޖެ އެވެ.
Advertisement
ދުބާއީގައި މިހާރު ކުރިއަށްދާ މޫސުމާ ބެހޭ ކޮންފަރެންސް، ކޮޕް28 ގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ކަނޑުފަޅުން ބާނާ މަހާއި، ކޮންމެ ވެލިފުކަކީ ވެސް އަގުހުރި އެއްޗެއްކަމަށެވެ. ދެން ވިދާޅުވީ، މުޅި ރާއްޖޭގައި ފަސް މިލިއަން ގަސް އިންދުމުގެ މަޝްރޫއެއް ހިންގަވާނެ ކަމަށެވެ.
"އަޅުގަނޑުމެންގެ ކުދި ޖަޒީރާ ރަށްތަކަކީ، ވިލުންވެރި، ސާފު ފެހި މާހައުލަކަށް ހެދުމަށް އިސްކަން ދެން. މިގޮތުން، މުޅި ރާއްޖޭގައި ފަސް މިލިއަން ގަސް އިންދުމުގެ މަޝްރޫއުއެއް ހިންގުމަށް އަޅުގަނޑުމެން ވައުދުވަން،" ރައީސް ވިދާޅުވި އެވެ.
"އަޅުގަނޑުގެ ޖަޒީރާ ގައުމުގައި ކޮންމެ މުރަކައެއް، ކޮންމެ ވެލިފުކެއް، ކޮންމެ މަހެއް، ކޮންމެ ރުކެއްގައި އަގުއެބަހުރި. އެއަށް ލިބޭ ކޮންމެ ގެއްލުމަކީ ރާއްޖޭގެ އިގްތިސޯދަށް ލިބޭ ގެއްލުމެއް. ގައުމަށް ލިބޭ ގެއްލުމެއް،"
މުއިއްޒު ވިދާޅުވީ ރާއްޖޭގައި މިހާރު އިއާދަކުރަނި ހަކަތަ ބޭނުންކޮށްގެން އުފައްދާ ކަރަންޓުގެ މިންވަރަކީ 4 އިންސައްތަ ކަމަށެވެ. އެހެންނަމަވެސް ސަރުކާރުގެ އަމާޒަކީ ރާއްޖޭގައި ބޭނުންކުރާ ކަރަންޓުގެ 33 އިންސައްތަ ފުއްދައިދޭނެ އިއާދަކުރަނިވި ހަކަތައިގެ ނިޒާމެއް ކުރިއަށް އޮތް ފަސް އަހަރުގެ ތެރޭގައި ގާއިމުކުރުން ކަމަށެވެ.
އަދި މިލަނޑުދަނޑި ހާސިލްކުރުމަށްޓަކައި 600 މިލިއަން ޑޮލަރު އިތުރަށް ހޯދަން ޖެހޭ ކަމަށާއި މިކަމުގައި ދުނިޔޭގެ ގައުމުތަކުގެ އެހީތެރިކަމަށް ރައީސް އެދިވަޑައިގެންނެވި އެވެ.
"ތިމާވެށްޓާއި ރަހުމަތްތެރި ޓެކްނޮލޮޖީއާ އިޢާދަކުރަނިވި ހަކަތައަށް ރުޖޫއަވުން މިހާރަށްވުރެ އިތުރުކޮށް ހަލުވިކުރުމަށް މަނިކުފާނު ކުރެއްވި އިލްތިމާސަށް އިޖާބަދީ، އަޅުގަނޑުގެ ސަރުކާރުން މި އަމާޒު ހިފަނީ، ރާއްޖެގައި ބޭނުންކުރާ ކަރަންޓުގެ 33 އިންސައްތަ ފުއްދައިދޭނެ އިއާދަކުރަނިވި ހަކަތައިގެ ނިޒާމު، ކުރިއަށް އޮތް ފަސް އަހަރުގެ ތެރޭގައި ގާއިމުކުރަން" އެމަނިކުފާނު ވިދާޅުވި އެވެ.
ކޮޕް-28 ސަމިޓުގައި ދިވެހިރާއްޖޭގެ ފަރާތުން ރައީސް މުއިއްޒު އަރިހުގައި ރާއްޖޭގެ މުހިންމު ވަފުދެއް ދަތުރު ކުރައްވާއިރު އޭގެ ތެރޭގައި ތިމާވެއްޓާ ބެހޭ މާހިރުން ވެސް ހިމެނެ އެވެ.
