ރައީސް ޑރ. މުހައްމަދު މުއިއްޒު އަދި ރައީސް ޔާމީންގެ ފޮޓޯއާއެކު ކެނޑިޑޭޓަކު ސޯޝަލް މީޑިއާގައި އާންމުކޮށްފައިވާ ކެމްޕެއިން ޕޯސްޓަރެއް "އެކްސް"ގައި ހިއްސާ ކުރައްވަމުން މަލީހު ވަނީ ކުރިއަށް އޮތް ރައްޔިތުންގެ މަޖިލިސް އިންތިހާބުގައި ވާދަކުރާ އެއްވެސް ކެނޑިޑޭޓަކަށް އަދި މިހާތަނަށް ރައީސް ޔާމީން އެންޑޯސްމެންޓެެއް ދެއްވާފަނުވާނެކަމަށް ވިދާޅުވެފަ އެވެ.
ރައީސް ޔާމީންގެ ފޮޓޯ ކެމްޕެއިން ޕޯސްޓަރުތަކުގައި ބޭނުންކުރަން ޕީއެންއެފްގެ ފަރާތުން މަލީހުވަނީ އެދިފައެވެ.
ޔާމީން އުފައްދަވާ ޕީއެންއެފުން ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި "ބޮޑުކޮށް ވާދަކުރާނެ" ކަމަށް މީގެކުރިން މަލީހު ވިދާޅުވެފަވެއެވެ. އެ އިންތިހާބުގައި އެ ޕާޓީން ވާދަކޮށް، ކާމިޔާބީ ހޯދާނެ ކަމަށް ވިދާޅުވި އެވެ.
އޭގެ އިތުރުން ރައީސް ޔާމީންގެ ގާނޫނީ ވަކީލް ޑރ. މުހައްމަދު ޖަމީލު އަހުމަދު ވަނީ ޕީއެންއެފް ވާނީ ރާއްޖޭގައި އުފެދޭ އެންމެ ބިޔަ، އެންމެ ބޮޑު ޕާޓީއަށް ކަމަށް ވިދާޅުވެފަ އެވެ.
ވ. އާރަށް ކުއްޔަށް ދޫކުރުމުގައި ހިޔާނާތްވެ، އެ ފައިސާ ލޯންޑާ ކުރިކަން ސާބިތުވެ ރައީސް ޔާމީންގެ މައްޗަށް މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން އިއްވި 11 އަހަރުގެ ޖަލު ހުކުމާ ގުޅިގެން އެމަނިކުފާނުގެ މައްޗަށް އެ ހުކުމް ދަނީ ތަންފީޒުކުރަމުންނެވެ.
