ދިވެހި ފުލުހުންގެ ހިދުމަތުގެ މީޑިއާ އޮފިޝަލް ދާދި ދެންމެއަކު ވިދާޅުވީ ދިގުރަށުގައި ވިހެއުމަށްފަހު ކޮތަޅަކަށް ލައި އެއްލާފައި އޮތް ތުއްތު ކުއްޖަކު އެ ރަށު ކުނިގޮނޑުން ފެނިފައިވާ ކަމުގެ މައުލޫމާތު ލިބިފައިވާ ކަަމަށެވެ. އެ މައުލޫމާތު ފުލުހުންނަށް ލިބިފައި ވަނީ މިއަދު ހެނދުނު 9:20 ހާއިރު ކަމަށް މީޑިއާ އޮފިޝަލް ވިދާޅުވި އެވެ.
މީޑިއާ އޮފިޝަލް ވިދާޅުވި ގޮތުގައި މި މައްސަލަ އާ ގުޅޭ އިތުރު މައުލޫމާތު ލިބޭ މިންވަރަކުން އެ އިދާރާއިން ހިއްސާކުރަމުން ދާނެ ކަމުގަ އެވެ.
"ސީއެންއެމް" އަށް އެނގިފައިވާ ގޮތުން އެ ކުއްޖާ އޮތީ ކަޅުކުލައިގެ ޑަސްބިން ކޮތަޅަކަށް ލާފަ އެވެ. ދިގުރަށުން މައުލޫމާތު ލިބުނު ގޮތުގައި އެ ކުއްޖާ ފެނިފައި ވަނީ ބިދޭސީން ގޮނޑަށް ކުނި އަޅަމުން ދަނިކޮށް ކަމަށާއި އެ ކުއްޖާ ފެނުމާ އެކު، އެކަން ރަށު ކައުންސިލަށް އެންގި ކަމުގަ އެވެ. އެ މައްސަލަ ފުލުހުންނަށް ހުށަހެޅީ ރަށު ކައުންސިލުން ކަމަށް ވެ އެވެ.
